followers

إجمالي مرات مشاهدة الصفحة

الأحد، 7 مارس 2010

هكذا الدنيا






مالك؟؟

زعلان شوية

مش طايق نفسك

مضايق

طهقان

زهقان

أنت عارف إن مش أنت الوحيد اللي كده
لو سألت صاحبك حيقولك نفس الكلام
لو سألت أي حد اليومين دول حيقول نفس الكلام

طيب تفتكر ايه السبب

الدنيا بقت وحشة أوي ومتعبة أوي .. مش كده

أنت مبقتش مستحملها

بالنسبة لشغلك ..فإحتمال تبقى عاطل بين يوم وليلة

وصحتك.. هي مش قد كده عمالة تنزل يوم بعد يوم

بقيت عصبي أوي

عاوز تحب وتتحب ومش عارف

بقيت بتشوف ناس كتير صغيرة في السن وبتموت

مش عارف تتوافق مع أهلك وعلى طول في خلافات مستمرة

عندك إحساس إنهم في عالم وإنت في عالم تاني

انت كويس بس مش عارف ليه دايما بيطلع الوحش منك

النهاردة زعقت لأمك وقلت مش قصدي

يمكن كمان كلمت باباك بلهجة مش ولابد

انت خايف بس خايف على نفسك وبس

مش مهم أي حاجة تانية

بقيت بتقول نفسي نفسي

بتحب تقعد لوحدك أكتر مش كده

يااااااااااااه.. قد إيه الدنيا متعبة

طيب شوف الآية الكريمة بتقول إيه " ولقد خلقنا الإنسان في كبد" ... يعني طول عمرك حتفضل شقيان في الدنيا .. حتيجي ليك لحظات رضا مش سعادة لأني مؤمنة إني السعادة موجودة في الجنه هناك وبس وكل الحاجات اللي نفسك فيها زي الراحة مثلا

تلاقيك بتكلم نفسك وتقول بس أنا نسيت الجنه

أنا أخدتني المشاكل

ونسيت كمان ربنا

مكسوف وانت بتقولها

بس يمكن أخدتك الدنيا

مع أنه هو اللي في إيده يحل كل مشاكلك

شوف الآيه دي "فقلت استغفروا ربكم إنه كان غفاراً يرسل السماء عليكم مدرَاراً ويمددكم بأموال وبنين ويجعل لكم جنات ويجعل لكم انهاراً"

مجرد تقول استغفر الله العظيم وليها مفعول السحر

أكيد بتقول أنا بستغفر ومش بيحصل حاجة

يمكن انت عارف ان في جنه

وعارف ان في ربنا

وعارف ان في استغفار

وعارف ان في قرآن

بس يمكن ناقصك شوية إيمان

شوية ثقة

شوية صبر

ناقصك الحاجات دي تكون جوه قلبك

بتدعي وبردوا خايف

بتستغفر وانت مش عارف

بتقول يارب ومش عارف اذا كان قبل ولا لأ

تيجوا نكون الثقة دي بجد

هي مش حتكون بين يوم وليلة

بس اللي وصلني للشركة دي

واللي كرمني بالبيت ده

واللي إداني الرزق ده

هو الواحد .. هو ربي

هو اللي حيطمني

وحيكرمني

بس في نفس الوقت حيختبرني

علشان يشوف قوة إيماني

وأنا لازم أنجح في الأمتحان

علشان أنا بحبه

انا جت عليه فترة قبل لما تسرقني الدنيا كنت بحب الدعاء أوي أكتر من اي حاجة .. جرب وانت حتشوف أحسن نتيجة

وختاما

اللهم أجعل الدنيا في أيدينا وليست في قلوبنا
اللهم أجعلنا من القربين منك
اللهم أرزقنا الجنه وأبعدنا عن النار
اللهم أرحمنا وأرزقنا القوة فإنا ضعاف


وأخيرا كن في قرب الله يكفيك.. يكفيك

:)

هناك 6 تعليقات:

sakayar يقول...

جميل البوست وأسلوبك فيه مختلف عن كلامك في أي بوست تاني يا راما
:)
فكرتيني بجملة سمعتها من أحد المشايخ في يوم
كان بيقول احنا مشكلتنا مش مشكلة نفس
مشكلتنا مشكلة روح
نفس الكلام اللي قلتيه في التدوينة كده
تسأل واحد : مالك ؟ مش عارف ... بس مخنوق ... طب ولادك مضايقينك ؟؟ لأ دول زي الفل ... مراتك طيب ؟؟ ياااه دي بلسم ... طب الشغل ؟؟ طيب طيب؟؟ مفيش أي سبب بس هي خنقة والسلام
بيقول الشيخ بتلاقي ناس حاسة بخنقة تروح مكان مفتوح ... تروح تشتري أكلة حلوة .. تروح تجيب هدوم جديدة ... لكن كل ده ومش بيحسوا بالراحة برضه لإن كل دي حاجات بتغذي النفس ... لكن مش بتغذي الروح
والمشكلة الأساسية هي في الروح لإن الروح جعانة
وغذاء الروح من السما ... قل الروح من أمر ربي
مش هيسعدها عربية جديدة ولا أكلة جميلة ... كل دي حاجات وقتية ومش بتغذي غير الجسم ... لكن اللي يغذي الروح هي العلاقة بربنا
:)

مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ

وهو ده الوجه الأجمل في الدنيا ... ونستكمله في الآخرة
:)
جزاكي الله خير راما على التدوينة البسيطة والجميلة
:)

ست البيت يقول...

راما ،
العزيزة بقالي كتير مدخلتش المدونة
حلوة قوي
وطمنتني
وكلامك صح
لني جربته
بس بسأل ربي يمن عليا بفضله وكرمه ولا يكلني لنفسي
هو أعلم ماذا تصنع نفسي في
فعلا الإستغفار
استغفر الله العظيم الذي لا إله إلا هو الحي القيوم وأتوب إليه
من قاله 3 مرات غفر له ولو كان فر من يوم الزحف

somaya يقول...

انا مبسوووووطة مووووت يارما انك كتبتى الكلام ده..لانه طالع من قلبك.والكلام الى من القلب بيبقى هوا الى حاسين بيه ومؤمنين بيه
اوووى.

ومبسوطة اكتر انى قرأت الكلام ده النهاردة لانك عارفه حالتى اليومين دول.وبجد كنت عايزة اسمع حاجة زى كدة.وصدقينى ربنا أحن من اى حد فى الدنيا

MarwaAshraf يقول...

أهلا سكايار .. وحشتنا طلتك على البوست وشكرا بجد على الكلام الجامد اللي قولتيه بس بعد كده مش تمشي من غير ما تشرب حاجة
تحياتي
:)

جزاك الله خيرا على التعليق البسيط والجميل

MarwaAshraf يقول...

جزاكم الله خيرا يا ست البيت
ومش تتأخري علينا تاني
واستغفر الله الذي لا إله إلا هو الحي القيوم وأتوب إليه

MarwaAshraf يقول...

سومة عاوزة أقولك اني بحبك وبس :)