followers

إجمالي مرات مشاهدة الصفحة

الثلاثاء، 21 مارس، 2017

كل عام وأنت أمي

R@M@




هي جميلة
 

منفعله

لا بل هادئة 

رقيقة 

سخيه 

حالمه 

مقدامة 

حنونه

إلى كل صديقة .. سواء كانت اخت أو أم.. إلى كل سيده .. إلى كل فتاه .. إلى كل زهره.. كل عام وأنت أجمل أميرة في الكون .. كل عام وأنت بخير .. كل غام وأنت ملكه .. إني أحبكم في الله

الثلاثاء، 7 مارس، 2017

أميرة بمنديل قوية وفارس بشنب

R@M@



كان الزوج جالسا على الأريكة.. مردتيا سروال مخطط وفانلة بيضاء من الحملات... وكرشة الضخم ممد أمامه.. وكان يشاهد التلفزيون في ملل ورتابة ثم نادى على زوجته بصوت عالي  أجش قائلا : يا أميرة... فين الشاي؟؟

أجابته الزوجة من المطبخ وسط تكسير عدد من الحلل والكوبيات  بإمتعاض : حاضر يا فارس.. ثوانييييييي ثم قالت في نفسها : "يادي الهم .. ربنا ياخد الشاي"

خرجت الزوجة من المطبخ وهي حاملة كوب الشاي في يدها ... في خطوات ثابتة يصدر منها صوت منتظم، هو صوت "الشبشب المنزلي ".. وهي ترتدي جلباب معقود من منطقة الوسط أكثر من عقده... تحته هيكول برقبه وبنطلون طويل... وترتدي على رأسها  منديل مربوط للخلف ثم قدمت لزوجها الشاي وعلى وجهها تكشيرة محترمة.. وجلست على الكرسي الذي بجواره وتناولت طبق من اللب الابيض الموضوع على المنضدة المقابلة وظلت تشاهد مع زوجها التلفزيون دون أن تبادله كلمه واحده.

وظل الزوج الزوجة يشاهدان التلفاز في صمت تام  .. لا يقطعة غير صوت الزوج وهو يشرف الشاي بصوت عالي " سوووووف"  والزوجة تنافسة في قزقرة اللب "تك تك تك.. بوف".

 ثم إلتفتت الزوجة إلى زوجها ونظرت إليه طويلا وركزت بعينيها على كرشة الضخم وقالت في حوار داخلي طويل مع نفسها: بقى هو ده اللي حلمت بيه... هو ده فارس أحلامي... بعد ما حلمت بواد جان طويل ووسيم في هيبة رشدي أباظة وجمال وطله حسين فهمي...  يكون آخري إن  أخد راجل كل هوايته في الدنيا اللعب في صوابع رجليه والفرجة على شنبه في المراية... ولا المجانس... المجانس اللي قلت حتباهى بيها قدام الخلق... تطلع في بطنه بدل كتافة على شكل كرش كبير مالوش آخر... ده إيه الهم اللي أنا فيه ده... وأحلامي الوردية اللي حلمت بيها...  حلمت إني أنام كل يوم على أنغام الموسيقي بعد ليلة رومانسية جميلة أقضيها معاه... تكون نهايتي على سمفونية شخير سي فارس موزارت... وياريت على كده وبس ده مافيش كلمة عدلة بيعرف يقولها ... هو ده  فارس أحلامي الرومانسي الحالم.. كتبوا في كتب الرومانسية إني الراجل لما يحب يغازل مراته يقولها : يا حبيبتي, قومي إعملي شاي... وبعد كده يختصر الكلام الرومانسي ... "لقومي اعملي شاي وبس".... انا لو كنت اعرف إن الكرش والشاي والشنب الغريب ده هو نهايتي ماكنتش حلمت ولا اتنيلت  

نظر الزوج إلى زوجتة ووجدها منصبة بعين متفحصة على كرشة  الضخم فنظر إلى كرشه  في قلق ثم نظر إليها قائلا : إييييييييه... فييييييه إيهههههه... مالك متنحة فيه كده؟

انتفضت الزوجة قائلة : لا أبدا ... سرحت شوية.. عادي يعني   ثم عادت إلى قزقزة اللب ومشاهدة التلفزيون

وهنا أتى دور الزوج لينظر إلى زوجته ويدقق النظر في المنديل الذي على رأسها وتحته شعر مهوش في كل مكان ثم تقع عينه على خرم في كتف الجلابيه  التي ترتديها ويدقق النظر أكثر ليجد عدد لا باس به من الاخرام فيقول في نفسه :

ولا بنت البواب ... ده بنت البواب بتلبس أحسن منها ... يعني هي الهدوم خلصت من البيت... مالقتش غير الجلابية اللي بميت قاطعة  دي... وانا اللي كنت فاكر إني حتجوز منى ذكي ... اه لو شوف اللي قالي إن كل البنات واحد وبشوية حركات تقدر تكون في ميت شكل وشكل ... بقى ياربي هي دي أميرة أحلامي ... أميرة أحلامي بمنديل قوية على رأسها وشعر منكوش.. قبل الجواز كنت بحلم بمراتي متجددة ومتغيرة دايما وفعلا لاقيتها "نعم" المتجددة يوم تقوم بدور "شيتا" وتستخسر المشط يمشي على شعرها ويوم ألاقيها الخالق الناطق بنت البواب ... ساعات بنسى وأحس إني خلاص حديها حسنة ... اه لو اعرف بتجيب الهدوم دي منين... وياما حلمت قبل الجواز ببرفان مراتي الباريسي اللي حيخليها إمرأة متجددة كل يوم ... لاقتيها مش بتسخدم غير العطر المصري الشهير البصل والتوم ... وكنت متخيل إني حقضي أيام رومانسية جميلة كلها موسيقي هاديه ... والحقيقة إنها مش حرماني من الرومانسية دي ... عندها شوية شباشب بتعزف أحلى الألحان... وكل شبب ليه لحن مختلف عن التاني... أموت وأعرف بتجبهم منين .... لو كنت اعرف إني أميرة الأحلام بمنديل قوية وشبب بيعزف ألحان ماكنتش حلمت ولا اتنيلت ...


لينتهي المشهد والزوج جالس يلعب في أصابع قدمية بجوارة الزوجة وهي تقزقز اللب وكل منهم ينظر بحسرة إلى ذلك المشهد من فيلم " أغلى من حياتي " حين جرت  شادية على الشاطيء قائلة أحمدددددددد وصلاح ذو الفقار  يجرى عليها في لهفة قائلا منننننننننى

السبت، 27 فبراير، 2016

وداعا أبي وأخي






اسمه محمد أشرف.. لا تظن أنه لاعب الكره الشهير أو كاتب السيناريو الذي نجد اسمه مذيل على المسلسلات بل هو أخي .. أخي الوحيد .. يبلغ من العمر 28 عاما .. كان في خلاف مع زوجته ووصل الأمر بينهما إلى حد الطلاق وكان العند يلعب لعبته معهما .. تمنى محمد أن يرى ابنه الوحيد يزيد وابنته الصغيرة روفان ولكن خافت زوجته ان تفقد ولديها في لحظة .. حتى جاء ذلك اليوم الذي لا أذكر وقته او ساعته ولكنه حقيقي يوم السبت الموافق 5-12-2015 قيل انه توفي من الساعة التاسعة مساء وأنا وأمي في البيت قلقين على أخي الصغير الذي ظننا أنه اصيب حين اصطدم بشجره أو وقع في المدخل واصيبت قدمه .. كلمت أبي على الهاتف فوجدته يقول لي بصوت باكي : هو بخير ونحن قادمون .. لم أكن مطمئنه .. قلت لأمي ما حدث ولكني غير مطمئنه فقالت لي كلميه مرة أخرى فهاتفته واعطيت الهاتف لأمي : فقالت له : أشرف .. خليني أكلمه فقال لها : معلش يا أم محمد هو نايم فصرخت أمي : ابني 
فأغلقت الهاتف سريعا وأمسكتها من يدها وقلت لها أمي لا يجوز الصراخ فجأة رن الباب ودخل الأهل والاقارب وكلهم غير مصدقين لما يحدث ولا حتى أنا .. فأبت الدموع أن تنزل ورفضت أن يضمني اي شخص .. كنت فقط أريد حضن أمي ولكني كنت أعلم أني سأتعبها معي فهو إن كان أخي .. ابنها الوحيد .. أنام باكيه كل ليلة .. أتذكر موقفه هذا وضحكته تلك وطفليه يزيد (سنتين) وروفان (6أشهر) .. كنت موجوعه واشعر بالألم ولكن وجود أبي بجواري جعلني في حالة ثبات .. ابي الذي كنت ادعو الله دائما الا أرى فيه مكروه وانا على قيد الحياة .. حتى مرض ابي بألم في الظهر وقد كان يشكو من السكر والضغط وفيروس سي ويتناول دواء السوفالدي.. وجاء يوم آخر قالت أمي بروحها الطيبة : المحشي ده احنا مش حناكله يا مروة .. قلت لها في رفض : ليه ياماما .. بابا حيبقى كويس وحتشوفي .. دعوت له في صلاة الظهر ان يبارك الله في عمره وان يشفيه من مرضه 
بابا الذي طلب مني ان اظل بجواره ولا أذهب إلى اي مكان وأنا أقول بهدوء يا أبي سأعود لا تقلق .. لقد كان يشعر أنها النهاية وكان يقول الشهادة من وقت إلى الثاني وجاء يوم الأحد  .. كان أبي يتصبب عرقا ويقول لي : مانمتش من إمبارح يا مروة .. قلت له : معلش يا بابا استحمل .. هانت ده فاضل يوم واحد في دواء السوفالدي .. هانت وهو يقول يا مروة أنا انتهيت .. أكل كوب من الزبادي وظل يتصبب عرقا ويشرب ماء .. نزلت إلى الصيدلية القريبة ورجوت الدكتور أن ياتي معي لكن الصيدلية لم يكن بها غير دكتور واحد فقط .. علمني كيف أعطي والدي الحقنه ولكن أبي أبى وأعطى لنفسه قليلا من الحقنه في الوريد .. قلت له سآتي بالدكتور الساعة الثالثه .. جلست مع أمي وظل أبي ينتقل بين السرير والكرسي حتى سكن تماما على الكرسي.. ظننته فاقد الوعي .. صرخت أمي قلت لها : ياماما ده مغمى عليه .. غيبوبة سكر .. انا رايحة أجيب الدكتور .. ورفض مرة أخرى أن يأتي معي وارسل صبي صغير ليقيس له الضغط والسكر .. فقلت له : بابا كويس 
الصبي : ايوة بس روحي هاتى دكتور .. واتيت بالطبيب وكان نفس الطبيب الذي أخبرنا بوفاة أخي .. قام بكشفة ثم قالها لنا في سرعه : البقاء لله 
ليأتي يوم الأحد22-2-2016 .. ويخبرني أنني لن أدخل وأقبل أبي من جبينه مرة أخرى .. لن أقيس حرارته ... لن أمسك له يده .. لن استشيره قبل عملي الجديد .. لن أقول كلمه أبي مرة اخرى لانه قد مات 
رب ارحمهما وأنر قبرهما ووسع فيه مد البصر وأنس وحشتهما وأغسلهم بالماء والثلج والبرد واجمعني بهم في الفردوس الأعلى من الجنه يارب العالمين 

الثلاثاء، 2 يوليو، 2013

حملة تفرد.. رئيس جمهورية نفسي

R@M@http://www.blogger.com/blogger.g?blogID=2522889524226687105#editor

تجرد : احنا مع الشرعية ومع مرسي

تمرد: احنا مش عاوزين مرسي .. ومع الشرعية والدين

تكحرت : أنا رايح الساحل اروق اعصابي شوية .. العزيز محمد زهيري :)

تشرد : والله ما انا فاهم حاجة فين الكنبة .. هاتوا روتانا سنيما .. الله يخرب بيت اليوم اللي قامت فيه الثورة

تفرد : أعاااااااااااااااااااااااااااااااا.. محدش هنا الحكومة .. أنا الحكومة .. أنا رئيس جمهورية نفسي وانا اللي هختار.. شكرا حياة عبد العزيز لأختيارها اسم الحملة 

انا شايفة إن الفلول والشرطة واللي كان شايل هم ثورة يناير فوق دماغة بيتحرك دلوقتي بكل قوته علشان يموت الثورة (الثورة المضادة).. علشان ننسى حق الشباب اللي مات .. علشان ننسى حريتنا اللي طلبنا بيها من سنين .. أنا اعترفت وبعترف تاني .. أنا أسمي مروة اشرف عبد المنعم.. مسلمة سنيه بقولها بأعلى صوت : أشهد أن لا إله إلا الله وأن محمد رسول الله

أنا مش بقيت بخاف زي الأول .. أنا بقيت أخاف أكتر بس عارفة إننا ذكرنا في القرآن الكريم وإننا خرجنا من مواقف كانت أصعب من كده .. أنا بس مش متعودة على الفتنة الغبية اللي بقينا فيها دي وعارفة مين اللي بيراقب وهو مستمتع .. اسرائيل وأمريكا وكبيرة اللعبة قطر الله يلعنهم جميعا

احنا اخترنا غلط كفاية انه مخرجش حتى لأنصاره يقول كلمه واحده وكأنه خايف مننا .. خايف من شباب بيحلم وحيفضل يحلم لحد لما يموت .. انا من بدري وعاوزة أكتب عن حملة تفرد بس كمية التناقض اللي
كان على صفحة الفيس بوك والخنقة اللي صابتني والهم اللي صابني والشتايم والشك وانك تفقد أقرب الناس ليك.. نفس الهم وقت ثورة يناير .. بس قررت إني أخرج منه وأدع ربنا .. ربنا كبير أوي يا جماعة ومش حيسيب أم غلبانة تموت مقهورة علشان خاطر ابنها .. أو زوجة مكلوبة .. أو طفلة وطفل حيعيش عمره من غير كلمة بابا .. أو شاب ساب الدنيا من قبل لما يكمل رسالته فيها .. أو بنت سابت اهلها علشان الجنه .. علشان المكان اللي فيه ما لاعين رأت ولا عين سمعت ولا خطر على بال بشر

وحشني أ. عادل القاضي .. وحشوني اصحابي اللي ماتوا وارتاحوا واصحابي اللي عايشين ووحشني الموقع .. مفتقدة القناة .. كنا شغالين فيها بضمير .. صحيح كان فيها ناس متعصبة لجهة بس احنا كان ولا بيهمنا وبنشتغل علشان خاطر الرسالة .. أنا دلوقتي بس فاهمة .. رسالة المكان اللي كنت فيه .. رسالة كلية الإعلام اللي اتخرجت منها.. يعني ايه ابقى محايدة .. أنا الحمد لله طول فترة شغلي ماكنتش ضد حد

أنا شايفة الناس في رابعة وعند جامعه القاهرة .. بفتكر جو رمضان .. انا عاوزة الجو ده بس مع رئيس نضيف ايده مش ملوثة بالدم .. دم المسلم أو غير المسلم كتبت عنها حرام وانا شايفة انك يا مرسي
مسئول عنها أو انك ضعيف زي اللي سبقوك .. مش عارف يعني ايه .. معاك 90 مليون مواطن تحت أمرك.. وشغال عندهم .. ايوة انت كبير في السن ويمكن دي المشكلة .. لحد امتى حنتكلم كده .. لحد امتي
حتقول ان زي الأب .. لحد امتى حتضحك على الناس كده

انا مع مصر ومش معاك يا مرسي .. مع مصر .. وضدك يا مرسي وضد الجماعة اللي عاشت في قهر ومارست علينا كل أنواع العنصرية .. يعني ايه يستخدموا آيه في القرآن الكريم لحسابهم.. بس ان شاء الله

الرئيس الجاي حيحميكوا زي رئيسكم بالظبط علشان احنا دايما مع بعض
أنا ضد قناة الناس لأنها بتحرض على القتل وضد قناة سي بي سي والنهار  لأانها بردوا بتحرض على القتل
وضدك يا باسم يوسف علشان أمريكا وراك .. كان نفسي تفضل زي ما انت على اليوتيوب بس الفلوس بتغير النفوس 
 

من أنا ؟
مروة أو راما
عايشة في الدنيا بقالي كتير
مسلمة سنيه
مصرية أبا عن جد
بكره الإخوان المسلمين لكني مش ضدهم
بكره مرسي لكني مش ضده
بحترم القوات المسلحة لكن مقتنعه إنها دورها تحمينا من التعابين اللي بره
نفسي في رئيس جديد منتخب لشعب مصر بكل طوائفة
نفسي في رئيس يعتمد على الشباب ويراعي أحلامه اللي وصلت حدودها لحد السما
نفسي المهلة تخلص بقى ويجي الحل من عند ربنا بسرعة بس ان الله مع الصابرين
انا حفضل متفائلة رغم القصيدة الهم اللي حنشرها على مدونتي بس كل كلمة فيها هي الحقيقة.. اسيبكم مع قصيدة عمرو قطامش أنا مش أسف

أتاك الفل والثوار والأحرار والأشراف والأوقاف .
والهياس والمياس والبطل الذي فينا .
وجيت الثورة مع دينا .
وقالوا عني علماني وليبرالي
قاعد في الخيمة مع سالي
معايا نستو وسويتر
ودستوري على تويتر
وأنتيمي العزيز بيتر
واشعاري حزام ناسف
وده رأي ومش آسف
--------------------
ده رأي ومش آسف
عللي وعللي الصوت .. وأدي لخوفك الشلوت
علشانك واقفين لقدرنا .. هتعيشي لما أحنا نموت

خلاص آمنت بالوحله .. وبكره الجاي مش أحلا
وكل توته في تويتر .. عن الثورة كانت سحلة

ولما نمنا في الشارع .. صحينا وكنا محلمناش
وراح الحلم مش راجع .. ومن مات اتقتل ببلاش

عللي وعللي الصوت .. وأدي لخوفك الشلوت
علشانك واقفين لقدرنا .. هتعيشي لما أحنا نموت

بكبر ضدي على موتي .. وحلل دمي في الشارع
وكان سامع أكيد صوتي .. بصلي جنبه في الجامع

بنشكيلك ونشكيكي .. وندعي لربك الغافر
فقام فجأة ولعن ديكي .. عشان حبي طلع كافر

عللي وعللي الصوت .. وأدي لخوفك الشلوت
علشانك واقفين لقدرنا .. هتعيشي لما أحنا نموت

وبعد الغنوة لو جولي .. خدوني أمي تفرح بي
ومش قلقان يعدولي .. عشان قلبي في أيد صحبي
وصحبي دا اللي طمنته .. بأشعاري وطول صبري
ولما رجعش أمنته .. يقوم ثورة على قبري

عللي وعللي الصوت .. وأدي لخوفك الشلوت
علشانك واقفين لقدرنا .. هتعيشي لما أحنا نموت

http://www.youtube.com/watch?v=lWcufgeyL0U  

الجمعة، 28 يونيو، 2013

همسة عتاب .. الجزء الثاني




قبل أولا : بالخطأ نزلت مدونتي إمبارح صور بس ياترى فهمت ايه منها؟

أولا: وقبل كل شيء أحب أعمل توضيح للبوست اللي فات .. أنا وبكل فخر وعزة لا أعمل لأني مريضة .. هششششششششش ده سر

شايفاك .. شايفاكي .. بدل ما تجيبوا في سيرتي بس ادعوا لي بالشفا

- هو أنت عندك ايه يا راما؟

- أنا عندي شعره ساعة تروح وساعة تيجي ..
صراحه : أنا عندي نقطة -ممكن يكون الإخوان هما السبب فيها- بس أنا عندي نقطة نزيف في الجزء اليمين من مخي يعني برافو أحسن من ناس كتير .. نعمة من عند ربنا علشان أرتاح شوية من هم الدنيا الوحشة التي لا تسوى جناح .. برافو ايه التركيز ده.. لا تسوى جناح بعوضه

- شكلك كده إتجوز؟

اه ومن وراكو كمان .. يا باي
صراحه: لا طبعا .. انا بني آدم مدبوح على رأي أحمد السقا وكلهم أوغاد.. لكمني لكمة في رقبتي فصارت كالعجين .. بصراحة انا تعبت من الغاضبون أي الأوغاد والغاضبات اي الوغدات

أولا: عاوزة أحب أروى وحياة وسمية .. شكرا ليكم ولوفقتكم جنبي .. يارب ربنا يحقق لكل واحدة فيكم أعز ما تتمنى

ثانيا: عاوزة اقول لبابا "المجلس العسكري بتاعي " عم المشير انا عارفة اني كنت محتاجة منك شوية قسوة بس كفاية الله يخليك.. أشرفتيانو قلبي الصغير لا يتحمل .. لماذا عرقتله خوسية (إعلان شيكولاته أظن انكم عرفينها اكتر مني)

ثالثا: المانا أو ماما.. أنا عارفة ان الجنة تحت رجليكي الحلوين دول ولولا مرضك كنت قعدت جوه حضنك الجميل .. ماما أنا أسفة على كل حاجة عملتها من غير لما أقصد بجد

رابعا: يام أو مي .. أختي اللي شالت ومازالت تشيل "الهم".. انت حد مستفز بس بحبك اوي ياريت نبعد عن بعض الفترة دي .. علشان دماغنا حجر صوان :).. إلا هو يعني ايه صوان

خامسا: يس اس 2 إلا هو الوغد المنتظر.. أنا هجيب نضارة شمس وحتغير علشان نفسي مش علشانك.. ياسين أنا ولا بيهمني ماشي .. ياسين طظ فيك

سادسا : أصحابي اللي بحبهم أوي .. انا مش زعلانة منك يا مروة غنيم ولا من هبة غنيم في سكر سنترافيش جاي في السكة .. إلا صحيح هو ولد ولا بنت؟

أما بالنسبة ليك يا "أيات فاروق" انا فقدت تلاتة من أعز اصحابي بس علشان كنت مشغولة اسمهم نرمين ثم لمياء ثم إيمان.. يارتني سبت الشغل وروحت أشوفهم بس لا يعلم الغيب إلا الله .. أخر واحدة شفتها في جنازة بابا العظيم عادل القاضي بعدها هي راحت عند ربنا وسابت الدنيا الوحشة أوي دي

وانت يا صافو ولا أقولك يا صفاء.. عمرو خالد غير شخصيتك قضى على روح المغامرة عندك.. كل حاجة بخطة هو الخطط مهمة للمستقبل بس مش مهمة لصابحتك راما.. فاكرة قلبين والمخرج العصبي .. فاكرة فوتا عاوزة اطمن عليها هي وهالة وهدى.. فاكرة السنيما .. فاكرة ولا نسيتي؟

وفاء كانت عشرة حلوة أوي وشكرا للبانيه بتاع ماما بس ايه هو جه وحينسيكي راما  .. طيب ربنا يسعدك أنت وهو يارب .. قولي أمين

وأخيرا يا أحلى أصحاب سواء كنتم أولاد أو بنات، انا فاكرة المطعم بتاع الفول والطعمية والجيم وبتاع عربية الفول وفاكرة دريم لاند وماجيك بارك والسفر في العين اللي مش باردة واسكندرية قبل المظاهرات والمنبار بتاع بلبع.. انا فاكرة كل حاجة حلوة بس انتوا عاوزني ازعل منكم .. وهنا أهديكم دول

الأغنية الأولى :
يبكي ويضحك .. لا حزنا ولا فرحا

الأغنية الثانية :
ياحبيبتي ليه تستغربي لما بكون حزين جدا سعيد

الأغنية الثالثة :
مودو ردوا علي

وأخيرا علشان اللغة اللإنجليزية
أغنية somebody is me بتاعت انريكو

واخيرا .. أنا كتير أوي ببقى لوحدي.. الحمد لله عندي حاجات كتير ممكن أعملها لوحدي .. بس ربنا خلقنا علشان نتعارف ، بفتكر الرسول عليه الصلاة والسلام لما قال لصديقة أبو بكر .. لا تحزن إن الله معنا

أنا أسفة بس دي همسة عتاب راما لأصحابها الوحشين .. بحبكم اوي وحشتوني بارتياع ونفسي اشوف صوبع أو عقلة إصبع منكم
 

R@M@

الأحد، 23 يونيو، 2013

المشروع



R@M@



نقلة كبيرة

نقلة خطيرة

نقلة غير متوقعة

حد عضلات ومجانس وعرض وطول .. شالني شيل وحدفني لاقيت نفسي في أكتوبر

ايوة بقيت بشتغل في اكتوبر

حيث الرمال الصفراء الناعمه

حيث الشمس الحارقة نهارا

حيث الهواء الشديد والظلام المعتم ليلا

حيث الطريق الدائري وسيارت النقل

حيث حوادث الطريق والسيارات المهشمة المخرشمة

حيث ان لازم أسيب المترو اللي كنت بركبة من اعدادية لحد لما اشتغلت

وأروح أركب الميكروباص أو حتى المني باص اللي ماكنتش بقربله إلا في المناسبات علشان أنا طبعا تربية متروهات ومش متعودة على العوادم

في هذا البوست حكلمكم عن رحلة العذاب التي تبدأ من الثامنة صباحا حتى الثامنة والنصف ليلا أو بمعنى أدق أكتوبر رايح جاي .. بطل الرواية الميكروباص  والميني باص

الحمد لله طبعا إني لاقيت الميكروباص اللي  يوصلني لشغلي بس

إحساسك انك جوة صندوق مقفول عليك مع أشكال مختلفة من البشر .. احساسك انك محجوز جوه الصندوق من غير ما تقدر تفرد رجل أو ترفع اييد أو تتمشى شمال ويمين حاجة مريعة جدا جدا خصوصا ان المترو في أوقات معينه يعني كان بيسمح ليك بكده

ولكن أنا  بقول إن الحمد لله إني لاقيت الميكروباص اللي  يوصلني لشغلي بس

الألقاب الجديدة اللي حصلت عليها ومش حابة اسمعها.. منها مثلا  الحجة.. طبعا يارب احج بس انتم عارفين مدلولها ووقعها من سائق الميكروباس .. اللي يقولي انزلي هنا يا حجة وانا اقولة الله يخليك يا بني ده غير كمان لقب ست الكل بنكهة بلدي اصيلة مع الضغط على حرف التاء ولقب الأبله أو المودام 

ولكن الحمد لله طبعا إني لاقيت الميكروباص اللي يوصلني للشغل بس

لما يركب جنبك واحد من اياهم .. يحب يحس بالدفا وانت مش عارف تعمل ايه 
ترمي بصه .. تجرب تنظر شذرا.. تقول أوف.. تجرب تغني " يازانقني وجنبك فاضي"...  تجرب تتحرك وتلزق في الباب والشباك .. لحد ما تبقى ملتصق بيهم بل وجزء منهم وبردوا الأخ مصر إنه يدفى .. لحد ما تفكر انك فعلا تولع فيه علشان تدفية

إلا أن الحمد لله طبعا إني لاقيت الميكروباص اللي يوصلني للشغل بس

لما تحاول تقضي الساعات الطويلة  اللي بتقضيها في الميكروباص تقرا كتاب أو قصة مثلا وأهو تستفيد من الوقت .. ولكن ده يعتبر حلم بعيد المنال خصوصا انك بتطلع فوق وتنزل تحت وتروح شمال ويمين وكل حاجة فيك بتتهز وتتحرك بسبب السرعة الجنونية اللي بيمشي بيها الميكروباص لأنه طبعا خدوم.. وخدوم جدا وعاوز يوصلك للشغل بسرعة.. عارفين القط "توم" لما بيطلعلة زرزورة في دماغه من كتر الدق عليها.. اهي دي نهايتي خصوصا وانا نازلة من الميكروباس لازم ختم النسر اللي هو خبطة محترمة في الدماغ

المهم تسيب القراية وتقول أتأمل الطريق .. تلاقي قدامك فيلم رعب .. السواق فاكر نفسه بيلعب العربيات المتصادمة .. يجري ما بين عربيتين نقل عادي جدا.. يفرمل على أخر لحظة عادي .. يطير من فوق المطب عادي عادي عادي ما هي لعبة بقى.. وطبعا في مؤثرات بصرية وصوتيه تخليك تعيش فيلم الرعب بجد .. انك تلاقي عربية مهشمة قصدي بواقي عربية على الطريق في حادثة محترمة .. فطبعا مابيكنش قدامك غير انك تدعي النوم (أي تعمل نفسك نايم) وتقول الأذكار لحد ما توصل وتقول اللهم لك الحمد.. أنا لسة حي

والحمد لله طبعا إني لاقيت الميكروباص اللي يوصلني للشغل بس

انك تلاقي واحد معاك جوة نفس الصندوق الأبيض ومولع سيجارة ... هو مش ممنوع بردوا .. هو مش مستوعب طيب .. إزاي يدخن جوه الصندوق .. والشبابيك مقفولة والباب مقفول .. عارفين وصلت ان لما الصندوق فكر يملا التانك جوة محطة بنزين ... كان في واحد مولع سيجار ومبسوط بنفسة أوي .. ولما الناس عنفته بقى... قام الرجل الهمام وعمل حركة من أذكى الحركات .. نزل من الميكروباس وقعد يدخن جوة محطة البنزين حيث ممكن يولع فينا في أي لحظة ... بجد .. ما شاء الله عليك

وأنا مصره إن الحمد لله طبعا إني لاقيت الميكروباص اللي يوصلني للشغل بس

الميكروباس بقى بيوصلك بمزاجة .. تقولة يمين يقولك تحت أمرك .. ويوديك في المكان اللي هو عاوزة وبعدين يوصفلك توصل لمكانك إزاي .. ساعات يبقى بجح ويقولك هو كده انا ده أخري وساعات يقولك الطريق واقف وساعات يقولك العربية محتاجة شغل ومش حتقدر تكمل .. المهم انه في الآخر خد فلوس علشان يوصل نفسه مش يوصلك

والحمد لله طبعا إني لاقيت الميكروباص اللي يوصلني للشغل بس

الميني باص بقى ده حكاية .. اولا لو قعدت .. ده لو قعدت يعني تلاقي نفسك وكانك ملف مضغوط مافيش مسافة بينك وبين الكرسي اللي قدامك وطبعا تحس ان رجلك بتتبرد طول ما الميني باص ماشي أما بقى لو كنت واقف بقى فيهناك ويسعدك .. تلاقي نفسك بتطير .. ممكن مطب يخليك قاعد على حجر الراجل اللي وراك أو بقيت جمب السواق بقدرة قادر .. ما يميز الميني باص بردوا انه في مكان لكل الناس حتى لو مافيش مكان لنملة .. تلاقي الكمثري بقدرة قادر لاقى مكان

وطبعا طبعا الحمد لله إني لاقيت الميكروباص اللي يوصلني للشغل بس

أنا نفسي تنزل عليه معجزة من السماء

هذه المعجزة تخلي عندي فلوس أجيب بيها عربية

ونفسي تنزل عليه معجزة من السماء واتعلم السواقة بسرعة وأكون ذكية فيها خصوصا اني عندي مشكلة اتجهات زادت بعد ركوبي الميكروباس

ونفسي تنزل معجزة من السماء تخليني مش جبانة علشان اقدر اسوق في العشوائية دي

ما تقولوا أمين

علشان ربنا يستجيب وساعتها

ولا حركب ميكروباس

أو حتى ميني باص

بس أكيد حركب مترو

الاثنين، 19 مارس، 2012

جوبز وبياض الثلج


عندما رحل العبقري ستيف جوبز عن عالمنا ورأيت تلك الصورة التي أمام أعينكم أدركت الفارق بين حياة الخيال التي نتربى عليها والواقع الذي نعيش فيه.

من منا لم يسمع عن بياض الثلج "سنووايت"، تلك الأميرة الجميلة التي حاولت الساحرة الشريرة بمختلف الطرق أن تقضي عليها لتكون هي وحدها من أجمل جميلات الأرض، ووصلت القصة للذروة حينما أعطتها تلك التفاحة المسمومة ففقدت الأميرة الوعي.. حتى جاء الفارس الهمام الذي يحل كل المشاكل .. لتعود بياض الثلج للحياة ويموت الشر ويعيشا في سعادة أبدية.

رحل بسلام

هذا عالم الخيال حيث المستحيل يمكن أن يتحقق ولكن العالم في الواقع يختلف كثيرا..  يعلن ستيف جوبز استقالته من منصبة الذي يتمسك به الكثير في الوطن العربي وخصوصا في مصر، بسبب عدم قدرة جوبز على العطاء ثم يتوفى بعدها  في أكتوبر 2011 عن عمرو يناهز 56 عاما بسبب إصابته بمرض السرطان في الكبد، وهنا ياخذ قطعة من التفاحة ويعلن القدر نهايته أمام الجميع.. وفاة المبدع العقبري جوبز 

ولجوبز أقوال شهيرة منها على سبيل المثال لا الحصر، "ابق جائعا، ابق أحمقا"،  فأن تبقى جائعا وتسعى للمعرفة هو حل مثالي وان تدعي الحماقة لتعرف أكثر ستجني الكثير في حياتك ولا تجعل الأزمات تحيدك عن الطريق بل بالعكس ثابر وستنجح في النهاية

عام الحزن

الحقيقة الواحدة التي لا جدال فيها في حياتنا تلك هي الموت ويعتبر عام 2011 هو عام الحزن بالنسبة لي... أعلن فيه رحيل موقعي الذي تربيت داخلة إسلام أون لاين ورحل أبي الفاضل عادل القاضي ورحلت صديقتين قريبتين من قلبي ورحل شباب كما قيل عنهم الورد اللي فتح في الجنانين.. رحلوا تاركين دنيا يتصارع حولها من يراها ذات قيمة وهي بالعكس لا تساوى عند الله جناح بعوضة 

تعلمت منهم الكثير ولكنني أشتاق إليهم أكثر.. وادعوا لهم بالمغفرة وأن ألقاهم في الفردوس على خير مع رسولنا الكريم صلى الله عليه وسلم
إلى الملتقى

"إذا عشت كلّ يوم كما لو كان آخر يوم في حياتك، فستكون بكل تأكيد، على حق يوما ما!".. لذلك طالما في العمر بقيه فأنت الأمل وفي يدك الكثير والكثير لتفعله .. اعفو عن الناس وسامح من أساء إليك حتى يعفو الله عنك.. صل رحمك..  بر والديك.. ادع لمن رحل وتذكر من هم بجوارك .. وأجعل لديك الأمل في اللقاء قريبا حيث لا كبد ولا شقاء بل سعادة فيما لا عين رأت، ولا أذن سمعت، ولا خطر على بال بشر.

السبت، 3 مارس، 2012

ده مجرد وغد.. الاشتغالة الأولى

حوار ليس بطويل (قصير يعني) بين الوغد وراما




الوغد : شكلك تعبان أوي يا راما.. هو أنت مش بتنامي ولا ايه؟

راما : مش عارفة .. عندي أرق التنين ومش بعرف أنام.. الحمد لله

الوغد: وكله بسبب الوغد مش كده

نظرت إليه راما في هدوء وعلى وجهها أجمل ابتسامة قد تراها على أى فتاه

بادلها الإبتسام ولكنها لم تكن نقيه كما كانت على الجميلة راما وأكمل قائلا : سبحان الله .. ما هو لو الناس تعرف إن الأوغاد مش بيخلصوا من الدنيا  

تتعالى قهقهة راما وتصل حتى عنان السماء ثم تقول ساخرة : فاكر رجل المستحيل .. كان عنده جملتين مشهورين أوي وبحب أحطهم في مواقف كتير بتحصل في الحياة: "تبا لك أيها الوغد"،"و"لكمه لكمة في أنفه فصارت كالعجين""

الوغد : إذن لماذا أراكي تتحولين إلى.. عفوا..  إلى إلى.. شبح؟

ابتسمت في سخرية قائلة: لأنه وبكل بساطه.. ولكمه لكمة في أنفه فصارات كالعجين

الوغد : راما .. ايه اللي انتي بتعمليه اليومين دول؟

قالت في سرعة وعلى وجهها أكبر وأجمل ابتسامة: بصلي على رسول الله.. اللهم صلي وسلم وبارك عليه، واستطردت قائلة : سيبك بقى وقولي عندكش شغل جديد للبنوتة السكرة راما... ها؟؟؟

الجمعة، 18 نوفمبر، 2011

واحد شاي






تقريبا كلنا بنمر بنفس الحالة.. أو معظمنا علشان محدش يقول إني بعمم

تخبط.. حيرة.. قلق.. تشوش.. ومن الآخر محدش فينا فاهم حاجة

مشغولين أوي أو فاضيين أوي أو مش عارفين ايه اللي بنعمله

مشاكل في البلد وبلطجة وأحداث بتأكد ليك الكلمة اللي بتسمعها في اليوم أكثر من مليون مرة : يا ترى مصر رايحة على فين؟

الطريق زحمة أوي جدا خالص من الخامسة صباحا حتى الواحدة بعد منتصف الليل وبقيت الوقت الطريق فاضي علشان الشتا دخل

مشاكل في الشغل مستمرة خصوصا ان الفلوس رغم انك شايفها منتشرة قدامك وخصوصا في مجال الإعلام لكن شركتك لسة عايشة على التنفس الصناعي واحتمال تدخل في مرحلة الموت المؤقت قريبا جدا

مشاكل عاطفية بالجملة.. سواء كنتم مترتبطين أو حتى على وش جواز أو محصلش نصيب أو بتحب ومش عارف تقولها لحد دلوقتي لأنك خايف.. وأسئلة كتير بتتردد بس الأكيد ان مافيش ليها جواب

علاقتك بربنا شوية فوق وكتير جدا تحت أوي.. بسبب الحالة الغريبة المتخبطة اللي بنمر بيها كلنا قصدي معظمنا

عارف لما العالم كله يكون دوشة ومبقاش عنده شغلانة غير الكلام والخناق وكل واحد فاكر نفسه بيقول اللي محدش قاله قبل كده، ده غير شغلك وحياتك وعائلتك وحبيبتك تكون عاملة دوشة تانية وكأنها مش شايفة اللي حاصل أصلا.. أما بقى جواك فدوشة أكبر وأكبر وأفكار من كل حته عماله بتتخانق علشان تفكر فيها الأول

وبليل النوم يعلن أن مخصامك لأنك مش عارف تشد الفيشه بتاعت دماغك وتريح شوية علشان تكمل يومك بكرة

ولو زارك النوم علشان انت مسكين وصعبت عليه تزورك الكوابيس وتقضي ليله من تلك الليالي.. أظن أنتم عارفين تلك الليالي

ما علينا

بالصدفة سمعت على موبايلي الأغنية دي

ورغم اني مش بحب الشاي وبعشق الكابتشينو "اللي بيعمل شنب" علشان محدش يفهم غلط

لاقيت إن كلماتها مختلفة وممكن تغير حاجة في النفسية المدمرة دي

وفرقت شوية معايا بس مش كتير علشان مش أكون كدابة

واللي بعت ليه الأغنية دي .. واحدة زميلتي في الشغل

فمن على مدونتي بقولها شكرا بارتياع يا أمال

أسيبكم بقى مع كلمات الأغنية اللي اسمها.. واحد شاي للمطرب علي حسين ومحدش يقولي ومن علي ده يا ست راما .. لأني حبيت الأغنية أكتر من علي نفسه رغم انه حد مميز
:)

عبى جيوبه من الأفراح.. وطاح في الحزن بالضحكه

وجلل صوته وقال ياجراح.. أديني قافلك السكه

ماهواش فاضي.. يضيع وقت على الماضي

عرف ان اللي راح مش جاي

قعد يشرب له واحد شاي

وروق باله وبحاله صبح راضي


***************

رسم على وشه بالألوان.. ورافع يافطة للأحزان

كتب فيها أنا الفرحان.. أنا الفرحان

ماهو شاغل دماغه بهم.. غلب حزنه بخفة دم

خسر دمعه طلع كسبان.. طلع كسبان

ماهواش فاضي.. يضيع وقت على الماضي

ليه تسيب الحزن في قلبك ياخد حته

حاول تاني ودور وأنت تلاقي السكة

في الإمكان تقلب حزنك مهما كان

بس اعمل زيه ودوب حزنك جوه الضحكه

ما هواش فاضي .. يضيع وقت على الماضي

عرف ان اللي راح مش جاي

قعد يشرب له واحد شاي

وروق باله وبحاله صبح راضي

وبما إني مش خبيرة أوي في التكنولوبيا .. فده لينك الأغنية على اليوتيوب

www.youtube.com/watch?v=LjvCoVKYbCM

وصباحكم مفعم بواحد شاي