جاء الحق

من زمان وانا مش بآخد اي موقف ضد اي حد إلا لما اعرف كويس من مصادر كتير وبعدين آخد موقف وأمشي في طريقي مستعينة بربنا

النهاردة كان يوم جمعة النصر تكريما للشهداء وعلشان نأكد للموجودين في النظام إننا مش قولنا ثورة وحتعدي واننا مستنيين علشان كل الحقوق ترجع وعلشان حق الناس اللي ماتت دي

ولاقيت أفكار كتيرة جت على دماغي.. أفكار بتقول ان هو ده الحق.. جاء الحق وزهق الباطل إن الباطل كان زهوقا

لا لكرامه محمد حسني مبارك علشان

هو اللي قتل كل الشباب الطيب اللي كان بيحاول يرسم شكل جديد لمستقبله

هو اللي خلى 40 % من المصريين تحت خط الفقر

هو اللي بنى العشوائيات.. خلى الناس عايشة في القبور

هو سبب البطالة

هو النفاق

الناس في عصره.. مش لاقيه تاكل ولا تشرب ولا حتى لاقيه عصير حلو في رمضان

هو اللي عذب ناس شريفة في السجون

ضيع عمرهم في السجن من غير أي ذنب

هو اللي قتل خالد سعيد وقتل ناس كتيره غيرة لأنه كان شايفها خطر رغم انها كانت بتسعى للإصلاح

كان بيساعده كل ظالم وفاسد ومستبد وميعرفش غير الأنانية وقتل حق

كل اللي أعرفه إن الشعب أحترم فيك فترة طويلة

سكت

استنى

افتكر في لحظة إن رسالة ربنا ليك يوم لما قرر ياخد حفيدك منك أنك حتفتكر انه موجود ويمكن تتراجع عن كل حاجة كنت بتعملها لكن للأسف ده محصلش

والشعب كله حزن علشانه

لأنه طفل بريء مبقاش غول كبير مفترس ومتوحش زي عمه اللي كان ليه دور كبير في كل الناس اللي ماتت دي

أنا مش بعتذر ليك بالعكس نفسي اشوف حق الشعب اللي انت افتكرت انه مات

بس هو اتولد وقالك بعلو الصوت الشارع لينا وحقنا حيرجع لينا لأننا معانا القوة اللي أكبر منك ومنهم .. ربنا .. الله هو أكبر قوة

واعتقد الناس اللي بتفكر ان بابا حسني زي ما بيقولوا ممكن يتخلى عن كل اللي عمله ويقرر يرجع فلوسة لمصر ويساعد بيها الناس ، شيء من المحال .. الراجل ده قفل على قلبه من زمان.. أنا حتى بقيت بستغرب انه اسمه في النهاية انسان

أنا كمان شايفة انه مش رمز لينا إلا لو كنتم عاوزين يبقى رمزنا هو الطغيان

يارب انصر ثورتنا وأبعد عنها كل ماكر أو نهاز للفرص
اللهم أنصرنا ليتولى أمرنا من يحكم فينا بالعدل
اللهم اعنا لنقتنص مما فعل هو وأعوانه ولنرد حق شهدائنا
اللهم اشفي جرحانا وأرحم شهدائنا
وألحقنا بهم يارب في الفردوس الأعلى يا كريم
اللهم أرفع راية الحق والعدل في كل بلد عربي
اللهم أنصر الإسلام وأعز المسلمين
اللهم إنا لا نريد أن نعبد إلا سواك.. فبقوتك عزنا
يارب أنصرنا بحق كل أم مكلومة وكل رجل أو إمرأة تقيه وسط هذا الشعب العريق
الذي يثبت للعالم كل يوم أن مصر بحق أعظم وأطهر من هذه الألاعيب الحقيرة التي نكتشفها يوما بعد يوم
أختم قولي بكلمه الله في كتابه الكريم : والله غالب على أمرة ولكن أكثر الناس لا يعلمون