أنا كده

زمان حكوا ليه حكاية جحا وابنه والحمار
دلوقتي شوفت الإعلان بتاع سبرايت اللي بصراحة وعجبني ودخل دماغي أوي كلمته أنا كده
وحاليا انا عاوزة أقول زيهم أنا كده

أنا راما إنسانة .. بحب ربنا أوي .. بحب الناس رغم كل حاجة ونحط تحت كل حاجة ميت خط .. بغلط علشان إحنا متفقين إني إنسانة .. بس بحاول أعمل حاجات كويسة علشان انا عارفة اني ماينفعش أدخل في خانه غير دي وده كان قرار وأخذته إني عاوزة أكون كويسة .. بتناقض كتير مع نفسي وتصرفاتي عادي والحياة حتعمل أكتر من كده .. بتصرف ساعات بسذاجه وعفوية بردوا عادي أكيد الحياة محتاجة قليل من السذاجة والعفوية يعني هو لازم كل الناس يكونوا بيعرفوا يخربشوا.. الناس ساعات بتفهمني غلط ومين قال انه لازم يفهموني صح .. مين قال إن لازم كل الناس تفهم راما إذا كانت راما نفسها مش فاهمة نفسها بس ما علينا.. راما ممكن تفرح علشان الفرح حلو وحلو أوي كمان وبتفرح على طريقتها علشان هي كده.. بس كمان ممكن تزعل والزعل معناه عياط أصلها حساسة شوية ورغم ان في ناس مضايقة أوي علشان دموعها قريبة بس هي معرفتش تتحكم في ده ومعرفتش تغير ده وبعدين هي صحيح حساسة بس في حاجات تانية كويسة ليه بقى نركز في نقطة ونسيب أخرى وقالت برافوا عليكو أنا كده.. ممكن كمان راما تتعصب وتهدى وتحاول وتلعب وتنكش وتفكر وممكن ممكن تحاول تبدع.. ممكن تضغط وتكتم لفترة بس أكيد ممكن تنفجر .. هي بس بتستنى الدبوس اللي بصراحة بيكون مستعد للشك في أي وقت

راما في فترة حاولت زي الشاطر جحا لازم ترضي كل الناس بس معرفتش .. لييييييييييه؟؟.. برافوا علشان إحنا ماينفعش نرضي كل الناس المهم رضا ربنا (يارب نسألك الرضا من عندك) وكمان رضاها على نفسها في بعض الأوقات وبعض الحاجات وبعض الأفعال علشان تستمر لأن الحياة عاوزة شوية ثقة .. بنقول ثقة من غير رضا أحمق يعمل غرور .. ده البزنين بتاعي علشان أكمل .. فراما قررت أنها حتحاول ترضي الناس اللي بتهمها .. علشان هي بتحبها وأي حد تاني مش حقدر أقوله غير اني بحبك بردوا بس بحب نفسي كمان .. ونفسي تعبت أوي وعاوزة بس شوية ترتاح وتشيل حاجات على قدها

ساعات بضعف لأني إنسان وساعات بحس بقوة غير عادية بفضل ربي لأني إنسان.. ساعات بساعد غيري وساعات ببقى محتاجة حد يساعدني.. ساعات بحاول أكون صديقة كويسة صحيح مش زي ما بيقول الكتاب بس بحاول وساعات بدور على الصديق الكويس لأني إنسانة

راما مش بتفكر في المدينة الفاضلة زي البعض ما بيتخيل ممكن بدور على المثالية حتى في نفسي لكن الحقيقة اللي مهما حاولت مش حقدر أهرب منها .. بالظبط إن الكمال لله وحده وإني في النهاية مجرد إنسانه فيها عيوب قبل المميزات .. أصل أنا كده إنسانة

كالعادة كلامي مش مرتب .. يمكن تفهمه ويمكن تقول عليه مجنونة .. حقك عادي.. ده مش حيضايقني لأني بالفعل عندي اللي يضايقني كفاية... اه ولأني بحب كلمة مجنونة .. أنا مجنونة

كل اللي عنده حاجة يقولها وانا مش حزعل ولا حضايق ولا حتعصب ولا حتنرفز .. لأن صعب انك ترضي كل الناس ولأن كفاية عليه شوية النجوم اللي بتنور حياتي واللي قربت مني واللي إن شاء الله حفضل أقابلها وأحبها وتحبني .. قربت بجد وعرفت أنا مين وحبتني كده بكللللللل حاجة فيه الوحش قبل الحلو.. صحيح ولأن الاستفزاز والضيق والزعل موجود موجود.. يتربص بنا جميعا اينما كنا

أنا أسفه يا جحا اني مااتعلمتش الدرس بسرعة

وانا أهو كتبت عن نفسي الحلوة الوحشة على قد ما قدرت .. مش حعرف أسيح أكتر من كده.. علشان أنا إنسانه

كتبت عن نفسي علشان أقول ..

أنا كده اتربيت على حاجات حلوة أوي واتزرعت جوايا وفضلت الحمد لله

شوفت وسمعت واتعاملت مع الحاجات الوحشة اللي بالتأكيد كان ليها تأثير

أنا كده اتعلمت من الدنيا شوية حاجات ولسة بتعلم خلتني الإنسان المتناقض الغريب اللي طول الوقت الشر والخير بيتحاربوا جواه

أنا كده بتغير بردوا وإلا أبقى طوبة عايشة ولا ايه

انا كده عرفت ناس زي السكر وحاجات زي العسل خلت حياتي فراولة باللبن :).. بحبكم أوي وربنا يحفظكم

أنا كده بحاول أكون كويسة علشان انا عاوزة رضا ربي مش علشان حد تاني

أنا كده.. إنسانة وبقولها وبكررها علشان في ناس كتير نسيت وأولها أنا تقريبا

انا كده وتعبت أكون حد تاني غير كده .. على رأي د. أحمد خالد توفيق سئمت التظاهر بانني اخر

بصراحة انا تعبت مش سئمت بس

فياريت .. تقبلني على كده ولو مش عاوز أنا بحبك بس أرجوك بلاش تضايقني أكتر من كده