أعزائنا المدونين والمدونات والزائرين والزائرات .. جاءني التاج التالي من مدونة
Whispers
لصاحبتها هبه.. أولا أنا عاوزة أعتذر ليها إعتذار جامد علشان أنا إتأخرت في الرد على التاج ، بس بجد غصب عني وكمان علشان التاجات بالنسبة ليه حاجة صعبة شوية وده لأن معظم التاجات عبارة عن أسئلة الواحد بتكلم فيها عن نفسة وديه حاجة صعبه جدا بالنسبة ليه.. بس مش مشكلة.. أنا مقدرش أرفض لهبة طلب .. يلا نبدأ
كنت طالب شاطر في المدرسة؟
أنا كان مستواي متوسط واعتقد إني لو كنت اهتميت بالمذاكرة شوية كنت بقيت من الشاطرين بس أكثر وقت كان ممكن يتقال عليه فيهم شاطرة هو الثانوية العامة شيدت حيلي فيها جدا علشان كنت عاوزة أدخل كلية إعلام وبعد كده رجعت لمستواي العادي
ايه كانت أحب مادة ليك في المدرسة والكلية؟
مممم... في المدرسة تقريبا كانت المواد الأدبية هي أكتر مواد بحبها وكان الأقرب لقلبي العربي والإنجليزي وعلم النفس وفي الكلية أنا كنت بحب دراسة الإعلام اصلا واللي كان بيكرهني في المادة هو الدكتور مش المادة نفسها
أكره مادة ليك في المدرسة والكلية؟
حلوة "اكره مادة دي" مصطلح جديد عليه.. أنا كنت مش بحب حاجة إسمها فيزيا كانت دايما بتحسسنني اني إحم.. والحمار واحد والرياضة أول لما بشوفها مخي بيضلم على طول..أما بقه في الكلية فكانت مادة "البحث" أنا أساسا مش بحب البحث خالص كان كله نظريات تجيب العته كنت مع مجموعة البحث بتاعتي عمله زي قطعة الشطرنج يقول ليها يمين يمين، شمال شمال.. الحمد لله إن كل ده خلص ربنا ما يعيدها أيام
كنت عايزه تطلعي ايه وانت صغيره؟
يااااااه.. حاجات كتير أوي بس أكتر تلات حاجات أنا فاكراها دلوقتي
رائد فضاء أو اي حاجة تبع الفضاء.. أصلي بحب الفضاء أوي بس للأسف لما كبرت عرفت إن الفيزياء والرياضة مهمين أوي علشان الحلم ده
تاني حاجة بقه كانت مدرسة وأعتقد مافيش طفله ماحبتش تكون مدرسة وعلى فكرة من احد اسبابي إن أطلع مدرسة كان علشان أضرب العيال زي ما الميس كانت بتضربني
آخر حاجة كانت ظابط شرطة وفضلت لحد إعدادي مع الحلم ده وكنت حدخل ثانوي عسكري وعايشة الدور جدا.. بس بعد كده قررت أكون إعلامية والحمد لله ثبت على الحلم وإديني بحاول علشان حلمي يتحقق
اسم مدونتك؟
راما.. أنا مهما كبرت صغير
لماذا اخترته؟ و ما هي نيتك من اختياره؟
في ايه .. براحة شوية.. نيتي خير طبعا.. مش عارفة ليه حاسة المضوع قلب بجد وإني بقيت في تحقيق.. بالنسبة لراما ممكن تدخلوا على بوست "حكاية البنوتة راما" وأنت تعرفوا وبالنسبة لأنا مهما كبرت صغير.. أعتقد لو سمعتوا الأغنية حتعرف أنا ايه كانت نيتي
هل فكرت في اغلاق مدونتك؟ و السبب؟
اه.. فكرت ساعات في ده والأسباب كتيرة ومش محدده ومش عارفة أرتبها دلوقتي
صورتك في المدونة... رمزيتها؟
صورتي في المدونة صورة "سالي".. رمزيتها بقى علشان انا حد بيحب لا بيعشق حاجة اسمها "كارتون" وبيعيش في العالم ده جدا وبحب شخصياتة أوي وبتعلم منها كتير وسالي من الشخصيات دي
لماذا دخلت عالم التدوين من الأساس؟
ممكن أول بوست كتبتة في مدونتي يرد على السؤال ده .. كان اسمه البداية
أحلى جملة قيلت لك في وصف مدونتك؟
أنا مش فاكرة جملة معينة طبعا.. بس الناس بتقول عليها تلقائية وبسيطة ودي حاجة بتفرحني
التعليقات بالنسبة لك. أهميتها؟
لما دخلت عالم التدوين .. كان أحد اسبابي إن اشرك الناس افكاري ومشاعري .. فما الناس بتتفاعل حلوة "تتفاعل" دي بفرح اوي وكمان علشان منها بكون صدقات مع ناس جميلة اوي زي هبه مثلا.
ما أحلى بوست كتبته؟ ضع اللينك ثم اذكر لماذا؟
كل البوستات أبنائي .. مقدرش أميز واحد عن التاني لحسن حد فيهم يزعل.. أقولكم على حاجة أدخلوا أنتوا ونقوا اللي تحبوه بس أنا مقدرش أعمل كده :)
أحلى مدونة قرأتها؟
ما تعدش بس أنا بحب المدونات المختلفة والمتميزة وخفيفة الظل والبسيطة و...و... و..
حد قل أدبه في التعليق؟ عملت ايه؟
delete
إيه اللي هيحصل لايميلك لما تموت؟
حيموت
اديت الباسورد لحد قبل كدة؟
لأ
ايه كانت علاقتك بيه؟
وبعدين بقة ما قولنا لأ.. قال علاقة قال .. انت مين بالظبط
اسمك؟
اسمي مروة :)
اسم الدلع المشهور بيه وسط أصحابك
راما
مجال دراستك؟
كلية الإعلام.. جامعة القاهرة/قسم الصحافة 2006
شخصيتك... نوعها ايه؟
السؤال ده صعب بجد.. مممممممم.. شخصيتي نوعها ايه .. أولا أنا أنثى (ولا فيه حد عند رأيه تاني) شخصيتي تجمع كل التناقضات اللي في الدنيا يعني مثلا أنا حد متردد أوي بس سريع جدا في قراراته.. أحسب نفسي طيبة شوية وحساسة شويتين وتلقائية و.... لا بجد مش عارفة أقول بس اللي أقدر أقوله اللي حيتعامل معايا ويقرب مني حيعرفني بسرعة علشان أنا كتاب مفتوح على وسعة وتقدروا تلقبوا في صفحاتة زي ما إنتوا عاوزين.. بس كفاية كده
مودك ايه؟
مودييييييييييييي بشكل بشع .. هههههههه
بتعمل ايه في وقت فراغك؟
حاجات كتير أوي أوي ححاول أقول شوية منهم
ممكن أقرأ كتب أو قصص وروايات وعادة معظم وقت القراءة بيكون في القصص والروايات
الإنترنت ده حاجة أساسية
أتفرج على التليفزيون
شوية تأمل كده على الماشي.. وقت الغروب والعصافير مروحين بيتهم أو في ليلة كده السما صافية والقمر فيها بدر منور
الرغي وده شيء مسلي جدا في وقت الفراغ .. ساعات انط جنب مامتي الطيبة على السرير وأفضل أرغي معاها لحد لما تنام مني أو في التليفون مع صحباتي الكويسين
ألعب مع طفل لذيذ
وساعات بكون زهقانة من كل حاجة وبحس بملل فظيع ومش بيكون ليه نفس أعمل أي حاجة في الدنيا ودي من الأوقات الوحشة جدا على فكرة
الأكلة المفضلة؟
يام يام.. بحب حاجات كتير أوي.. بحب محشي ورق العنب والسبانخ زي باباي والمشويات والشيبسي والأيس كريم والإندومي و...... انا كده ممكن أكتب كتاب بعنوان أكلات راما المفضلة
السفر بالنسبة لك؟
متعة ومغامرة واستكشاف
صفات أخدتها من بابا
العند
صفات أخدتها من ماما
الطيبة
أكتر 6 حاجات بتكرهها
ممممممم.. أنا بكره اسرائيل زي شعبولا بالظبط
بكره الحشرات عدا الفراشات
بكره الزواحف خصوصا الثعابين حتى مش بحب أشوف صورهم
بكره الفشل ومن الاخر بكره كل حاجة وحشة وشريرة في الدنيا
أكتر 6 حاجات بتحبها
لو على الحب أنا بحب حاجات كتير ياما علشان أنا قلبي كبير .. بحب الطبيعة أوي
بحب الدنيا لما تضحك
بحب الكارتون والأطفال الصغيرين
بحب مامتي أوي أوي
بحب الناس الطيبين
بحبني وبموت في التراب اللي بمشي عليه
ومن الأخر بحب كل حاجة حلوة وطيبة في الدنيا دي
الشغل بالنسبة لك؟
الشغل هو أنا .. بالنسبة ليه حاجة مهمة أوي علشان بحقق فيه ذاتي.. الشغل بالنسبة ليه مستقبل وأمان بس عامل زي موج البحر يوم ليك ويوم عليك
ايه الكمبيوتر و النت بالنسبة لك؟
صديق جامد أوي .. بيحبني وبحبه
تمرر التاج لمييييين؟
مدونة من أول لمسه.. لسلمى
مدونة قضية عم أحمد .. لعم أحمد
مدونة كلام من جوه .. لداليا
مدونة مصر يا ما يابهية .. للغزالي
مدونة عايش مع إيقاف النتفيذ.. لمنعم
ايييييييييييه ده.. خلصت .. مش ممكن .. ده طويل أوي .. دلوقتي ممكن أقول أشهد أن لا إله إلا الله وأنا محمد رسول الله
هناك 12 تعليقًا:
ايه ده ايه ده ايه ده ؟؟؟؟
ده بقى اسمه توافق و لا توارد خواطر و لا ايه يعني ؟؟
اصل انا كمان بحضر التاج ده من كام يوم بس هو طويل اوي وانا لسة ما خلصتوش
بس تعرفى يا راما
اجاباتنا متشابهة كتيير خاصة في موضوع رائد الفضاء ده
هههههههه
انتى شخصية طيبة وجميلة و ده واضح في اجاباتك
ربنا يوفقك و يحقق لك كل ما تتمنى
و ميه مسا بقى
هههههههه
تحياتي
الأخت: راما
أنا بشكرك على تمريرك التاج لي وربنا يستر بقى من الفضايح اللي هطلعها في الإجابات على أسئلة التاج.
الإجابات بتاعتك كانت تجمع بين الفكاهة والمرح وكنت مستمتع جدا وأنا أقرأ.
ربنا يجعلك سعيدة دايما.
سلام عليكم
:)
عارفة إني لسة امبارح كنت قاعدة بفكر في التاج دة وفيكي شخصيا؟؟ :) بجدوالله افتكرتك.. وفكرت يارترى هي لسة فاكرة الموضوع وفي دماغها ولا لأ!!! بجد سبحان الله. استغربت جدا لما شفته
:) بس أكييييييد فرحت جدا جدا جدا
حسيت إن فيكي كتير أوي مني، وخصوصا في وصفك للشخصية :) و الرسوم وكدة... بجد فرحت أوي أوي
بس طبعا انت أحلى بكتيييير :) وبحبك أوي
أنا طول عمري شغوفة أوي بموضوع الفضاء دة ولحد النهاردة بفتح مواقع على النت و اقرأ عن الظواهر الغريبة للنجوم والحاجات دي و أشوف صورهم.. بس عمري مافكرت أكون "فعلا" رائد فضاء
:)
أنا كمان بحب سالي جدا، مش أعتقد فيه حد شاف الرسوم دي أصلا ممكن يكون مش بيموت في شخصية سالي
ممممم...بصي... أنا بجد عايزة أقول كتير أوي، بس كفاية كدة عشان مش أصدعك، و كمان عشان بلاش يكون فيه تعليق طويييل كدة يضايق الناس
كنت هنسى
:)
وحشتيني أوي... وبجد بجد كنت مفتقداكي جداااا
تحياتي لواحدة بموت فيها من غير ما أشوفها
طيب انت لبستي في تاج وربنا كرمك وردتي ليه تروحي ملبساني فيه
حلو اويييييييييييل البلوج
و جيت ع لطول اتعرفت عليكي
كل سنة وانت طيبة
راما الجميلة
معلش علشان اتأخرت عليكي جدا انا عرفة سامحيني
بس يا بنتي كل يوم افتح اقراه تحصل حاجة وروح قفلاه وبعدين انا فيه خصلة اننا لما احب اقراه حاجة لحد عزيز عليا مابحبش اقراه بسرعة احب اقراها في روقان كدة علشان الكلام يدخل من عيني لقلبي براحته
بالنسبة لتاج احلى حاجة انك ردتي عليه بتلاقئية اللي كنت متوقعها منك من غير زواق كلام طالع من جوة لبرة على طول من غير تفكير خليكي كدة على طول على طول احسن خلاص الناس اللي زيك مابقوش موجودين
اخر حاجة كدة يا رما احنا فينا الحركات دي تدبسيني في التاج بعد ما تخلصي يلا ربنا يسامحك اصل اصعب حاجة في الدنيا انك تسالي نفسك
انا اكتر وقت بيرهقني هو الوقت اللي بقعد فيه معايا لوحدينا
بس اوعدك اول ما افوق من شوية مشاغل اليومين دول احقعد معايا و نجواب على الاسئلة
تحياتي من القلب
الحلم العربي
____________
يا أهلا يا أهلا .. طبعا لازم يكون في توارد افكار ، إحنا مش أصحاب ولا إيه .. مش بيقولوا الطيور على أشكالها تقع ... وشكرا أوي على البقين الحلوين.. ميه مسى يا باشا على أجدع ناس من المدونات الكويسة ... سلامات
عايش مع إيقاف التنفيذ
___________
العفو يا فندم اي خدمة وخش على التاج بقلب جامد وإنت تخرج احسن ما عندك.. ويارب إنت كمان مش سعيد بس لا وكمان مبسوط
تحياتي
Wish I were a Butterfly
______________________
يا اهلا وسهلا بأحلى وأجمل فراشة
ازيك ياسكرة وحشتيني قد الناس اللي بشوفهم في المترو كل يوم ودي نسبة مش قليلة على فكرة.. وبعدين والله إنت بتحرجيني بكلامك وببقى مش عارفة أقولك إيه.. ربنا يجعلني أحسن مما تظني ويغفر لي ما لا تعلمي
واتكلمي زي ما إنت عاوزة ، المدونة وصاحبتها تحت امرك.. شكرا أوي وسامحيني لو كنت مش عارفة أقول كلام حلو زيك
سلامات يا سكرة
أحمد رفعت
___________
أي خدمة يا فندم .. ورينا شاطرتك بقى وعلى فكرة إنت قدها وقدود
تحياتي
Boba
___________
ياريت يكون التعارف كويس وماتكنش دي اخر مرة ليكي هنا .. شكرا على وجودك وكل سنة وإنت أحلى
تحياتي
Salma Amer
____________
سلمتنا الجميلة ولا يهمك خالص المهم إنك قراءتي البوست بتمعن كمان والله كسفتيني أوي بكلامك وعلى فكرة أنا مستنية التاج اللي دبستك فيه على أحر من الجمر ومتاكده إنك حتجاوبي احسن مني ميت مرة .. واوعي تزهقي منك تاني في حد يزهق من سلمى بردوا .. ده كلام يا شيخة
بجد شكرا اوي على كلامك وعلى اهتمامك وعلى وجودك الدائم
سلامات يا أحلى سلمى
إرسال تعليق