السمكة "دوري"... أكيد اللي شاف "نيمو" أو مسلسل كارتون "رحلة البحث عن نيمو" يعرف "دوري" كويس أوي واللي ماشفش الكارتون بقوله ممكن تعرف شوية عن "دوري" في البوست ده و ياريت تشوف الكارتون علشان تعرفها أكتر على الطبيعة
الحقيقة انا بعد لما اتفرجت على الكارتون،... "دوري" دخلت قلبي على طول وحبيتها جدا... علشان حاجات كتير اوي ححاول أقول على شوية منها في البوست ده :-ا
دوري.. كانت اكتر حاجة بتميزها طيبتها وبساطتتها وانها دايما على طبيعتها ووجهها البشوش، بالأضافة انها كانت تلقائية جدا يعني اللي على قلبها على لسانها.. وساعتها افتكرت الناس اللي دايما لابسة اقنعة وبتحاول تظهر على غير طبيعتيها.. ، وأفتكرت كمان الناس اللي بتتملق وبتنافق بس علشان مصالحها الشخصية
دوري... كانت بتحاول تقدم كل اللي عندها وتبذل أقصى جهدها علشان تساعد اللي محتاج مساعدتها حتى لو ده حيعرضها لمشاكل كتير في الوقت اللي معظمنا بيقول : وانا مالي
دوري... كانت كل مشكلة بتقع فيها بتكون متأكده انها حتخرج منها ، ماشية بالكلمة اللي على لسان معظمنا بس عمرنا ما بنؤمن بيها وهو " إن كل مشكلة وليها حل " وكانت بتحاول تنقل ده "لمرهف" بابا "نيمو" طول رحلتهم لحد ما وثق فيها ومشي وراها وفي الآخر قدر يوصل لأبنه
دوري... كان دايما عندها أمل وكانت دايما بتبص للجانب المشرق فاكرة انا حوارها مع "مرهف" لما كان بيقولها وهما في بطن الحوت "ان منسوب الميه بينقص، تقريبا نصه بقة فاضي" وهي ردت عليه وقالت له "انا شايفة ان نصه التاني مليان" .. فساعتها سألت نفسي ليه معظمنا بيفتكر نص الكوباية الفاضية وبينسى النص المليان؟
دوري... كانت دايما بتنسى وهي كانت شايفة إن دي مشكلتها الوحيده .. بس زي ما اتعلمت منك يا "دوري" أنا بصيت للجانب الحلو من الموضوع لاقيت أنك بتنسي الاساءة وبتنسى لو حد أذاكي،.. وبتتعاملي مع المخلوق اللي اساء ليكي وكأن شيئا لم يكن .. فكرتيني بكلمة قرأتها لدكتورأحمد خالد توفيق لما قال "ليس المهم أن تنسى بل المهم ان تنسى أنك نسيت".. الكلمة دي عاجبتني جدا.. لاننا فعلا كتير بنسامح الناس على خطأ هما أخطأوه في حقنا لكن دايما بنكون فاكرين إننا سامحنا الشخص الفولاني عن الخطا العلاني
هكذا علمتني "دوري" واللي حسيت إني لو حاولت أطبق شوية من اللي اتعلمته منها ، أكيد حكون انسانة مختلفة ، أنا من حبي ليها سميت الموبايل بتاعي على اسمها خصوصا إن لونه لبني زيها :) .. وبجد بجد أنا بحبك أوي يا "دوري" وياريت يكتر في دنيا البشر ناس يحملوا بعض من الصفات التي تعلمتها منك
هناك 12 تعليقًا:
يااااااااه
لو الدنيا سهلة كده زى الكارتون
ماكانش بقى فيه مشكلة خااااالص
أنتى فعلا جيتى ع الجرح ياراما
لأنى اليومين دول بحاول أتعلم إنى أنسى الإساءة وأنسى إنى نسيتها
وإنى أتعامل مع الناس كلها بقلب أبيض
تعرفي
أنا حبيت دورى قوىىىىىىى
من كلامك عليها
أنا هاروح أتفرج ع الفيلم
ههههههه
ياه يا مروة
بجد لو هتصفك انت بأي وصف هنقول انك انت دوري فعلا ومش دوري بس أنت أحسن من الف دوري .
ربنا يحفظك يا مروة ويسعدك كما تجتهدي دائماً ان تدخلى السرور على قلوب الناس .
انت الافضل
يويو السكرة
أنت قلبك أبيض وجميل...، وعلى فكرة أي حاجة احنا عاوزين نعملها كل اللي علينا إننا ندرب نفسنا عليها لحد لما تكون عادة عندنا... فلو دربنا نفسنا اننا نسنى الأساءة وبعدين نسنى اننا نسينا أكيد حنقدر ننسى
فهمتي حاجة
:D
عم احمد
اللهم أمين الاول على دعواتك... وبعدين ايه الكلام الكبير ده... الله يكرمك ياسيدي ويبارلك... وأخيرا بقولك "بعض مما عندكم"... سلام
عجبتني جدا قصة دوري، أنا سمعت عن الفيلم ده كتير من أصحابي وكنت قررت أسمعه وجبت الفيلم لكن الكمبيوتر بتاعي حالف بالتلاته ما أنا سامعه بمجرد ما حطيت الفيلم على الجهاز بعدها بكام يوم الهارد ضرب بكل اللي عليه.
المهم عجبتني جدا كلمة الدكتور أحمد خالد توفيق: "ليس المهم أن تنسى بل المهم ان تنسى أنك نسيت"..، لأني والحمد لله رزقت بهذه النعمة أني أنسى الإساءة بسرعة جدا والحمد لله.
بن عطوة
معلش ان شاء الله قريب مش بس تسمع الفيلم لا وتشوفة كمان :)... وكويس انك بتنسى الاساءة بسرعه.. الاهم انك تنسى انك نسيت
ربنا يكرمك
من الجميل أن يتعلم الانسان من غيره...
والأجمل أن يتعلم من غيره كيف يتعلم ...
عارفة يا مروة
لما تحسى ان ربنا بعتلك رسالة على لسان حد
وتيجى فى الوقت المناسب بالظبطططط
جزاكم الله خيرا يا حبيبتى
ايمي صاحبتي
ايه الحكم الجامدة دي... أيوة أنا عارفة معنى ان ربنا يبعت لينا رسايل ومش لازم تكون على لسان حد بيكون ليها أشكال مختلفة بس ده موضوع تاني وكبير
جزانا واياكم يا ايمي وربنا يكرمك
كلما صادفت شخصية لطيفة في الحياة ورقيقة تمنيت أن يجعل الله نصف الناس مثلها
لماذا النصف فقط؟ لأن الكمال لله فلا أحد بلا عيوب مع تذكر أن الشخصية المنافقة أساسا شخصية مضطربة من وجهة نظر علم النفس
ولهذا أتمنى أن يجعل الله نصف فتياتنا مثلك في الرقة ومحاسبة النفس
على فكرة من زمان ما سمعتش حد بيحكي عن القيم
:)
منيح أن في حد متذكرها
عزيزتي د. حنان
عادة ما أجد في نفسي صعوبة أن أجيب على كلمات الإطراء حتى وإن لم تكن من باب المجاملة وقد يكون السبب في انني أشعر بأني لا أستحق هذا ممن حولي.. فأنا بشر مثلهم أخطأ وأصيب.. وما يسعني بعد هذا الكلام الرقيق منك إلا ان أتمنى ان يكون نصف فتيات الدنيا أحسن مني وان يبارك الله في خلقهم وخلقي وأخيرا أدعوا الله أن يغفر لي ما لاتعلمي ويجعلني أحسن مما تظني
أسعدني تعليقك
جميل جدًا يا مروة ،،، من زمااااااااان عاوز أكتب عن البحث عن نيمو ، و أفلام تانية كثييير ،،،، مبروووك النشـر ف عشرينات
>
>
ومبرووووك التدوين كمااااان صحيح :):)
شكرا على وجودك يا أستاذ ابراهيم.. وشكرا على التهنئة
شكلك عرفت مدونتي من البوست اللي انتشر في عشرينات، على العموم اهلا وسهلا بيك ضيف دائم على المدونة وأوعدك إني أزور مدونتك قريب وإن شاءالله ألاقي حاجات حلوة هناك
سلام
:)
إرسال تعليق