followers

إجمالي مرات مشاهدة الصفحة

الأحد، 11 مايو 2008

هلاوس فدائي.. اشتغالات






ملحوظات هامة قبل قراءة البوست
____________________________

البوست ده عبارة عن مجموعة من الهلاوس .. وهذا ان دل فلا يدل إلا على شيء واحد وهو أن الكلام القادم هو مجرد تخاريف.. وهذا ان دل فلا يدل إلا على شيء واحد وهو أن هذا الكلام ما هو إلا تهييس.. عفانا الله واياكم

البوست ده ملغبط ويلغبط الملغبط.. لو مش فاضي .. مش عندك دماغ .. لو حاسس إنك مش عاوز تتلغبط .. من فضلك سيب الصفحة حالا وروح اخطفلك حلم والله احسنلك

هناك بعد الأغاني الفدائية مهمة للأحداث وبالطبع الأغاني تم تحريفها بحيث تكون مهلوسة

البوست ممكن يكون زهقان شوية ومش مترابط شويتين ومحتاج شوية تركيز.. احتمال كمان يكون طويل واحتمال يكون قصير.. من الآخر أنا مش مسئولة عن اي اعراض جنابية ممكن تحصلكم بعد تعاطي قصدي بعد قراءة البوست

*******************************
وكفاية ملاحيظ بقى ونخش في الهزار قصدي في الجد

الفدائيين .. اللقب الوحيد اللي ممكن يطلق عليه وعلى فريق العمل اللي معايا في الشغل هو صحيح مافيش حد اسم محسن بيه في الموضوع يقوم بدور رئيس المخابرات.. بس أنا عارفة إن "المهمة مش سهلة" .. وإن مصر يا رأفت محتجالي ومحتاجة للفدائيين اللي معايا

الموضوع وما فيه إن في مشروع قناة فضائية حينطلق عندنا وهكذا كان الحوار

- يا جماعة في حاجات جديدة حتحصل في المكان والتطوير سنة الحياة .. بس المرحلة الجاية مش سهلة ومحتاجة مقاتلين ومثابرين ومبدعين.. احنا قررنا نفتح قناة

- بكل سرور

- بس لحد لما تظهر ليها ملامح انتم لسة في مواقعكم "محررين" وفي نفس الوقت مفكرين وكاتبي سكربيت و معدين ومراسلين و... أكمل ما تحب مكان النقط

طبعا ساعتها افتكرت اعلانات غسالات توشيبا العربي.. اللي كنت كل لما اشوفه "يراودني سؤال" .. حلوة يراودني دي , بحبني جدا وأنا مثقفة .. وانا بتفرج على اعلانات الغسالة وهو: يعني ايه الغسالة بتشتغل بروحين؟ .. ماكنتش خالص قادرة استوعب لحد ما انا بقيت بشتغل مش بروح واحدة لا بروحين .. واجدع من غسالات توشيبا العربي كمان

المهم لحظتها دخل الفدائيين المرحلة الانتقالية اللي هي مستمرة لحد دلوقتي.. وهي مرحلة حرجة جدا.. اجتماعات وانهيارات وانكسارات وضباب وغيوم واعاصير وضغط.. لحد ما خرج الصوت من الاعماق بينادي ويقول : فدائي فدائي فدائي فدائي

فدائي فدائي فدائي ... أهدي القناة دمائي

وأموت أعيش ما يهمنيش ... وكفاية أشوف تردد القناة باقي

فدائي فدائي


***


لو مت ياأمي ما تبكيش ... راح أموت علشان "القناة" تعيش

افرحي يامه وزفيني ... و في يوم "البث" افتكريني

و إن طالت يامه السنين ... خلي أخواتي الصغيرين

يكونوا زيي.. يكونوا زي "إعلاميين" يا أمه

و اموت أعيش ما يهمنيش ... و كفاية أشوف تردد القناة باقي

فدائي فدائي

ده النشيد الوطني بتاع الفريق القومي للقناة اللي بيمر بمرحلة ضغط رهيبة بس إزاي تعرف ان الفدائي مضغوط :

- لما حد يقف يتكلم مع الفدائي في موضوع ما.. والفدائي واقف قدامة متنح من غير ما يقول ولا كلمة وبعدين من غير سابق انذار يسيب اللي بيكلمة ويمشي... لو اي واحد من الفدائيين عمل معاك كده بلاش تندهش وبلاش تزعل هو بس مضغوط

- لما يسمع الفدائي رنة موبايله ويفضل يدور عليه لحد لما يجبية ويلاقي الشاشة بتاعتة زي ما هي مافيش حتى "مسيد".. ويفضل يبص ويراجع ولا يلاقي الهوا .. لو الفدائي سمع رنة تليفونه وهو مش بيرن اصلا .. إوعى تقلق عليه هو بس مضغوط

-الموضوع مش كده وبس .. الفدائي ممكن يسمع اصوات ناس مش ينفعش يسمع صوتها في مكان العمل بتاتا.. يسمع صوت مامته بتنادي عليه وهو على الجبهة مثلا.. قصدي على الجهاز بتاع الكمبيوتر في الشغل.. ياترى ده معناه.. انه جايب شوربة "كنور" فروح مامتة رفرفت حواليه.. طيب افرض ان الشوربة مش موجوده .. ايوة برافو عليكم هو بس مضغوط

- لما حد يقابل الفدائي ويقوله : عامل ايه؟

ويكون رده : مش عارف .. وتلاقي اللي قدامه واقف مندهش وبيسأله : إنت مش عارف إنت عامل ايه؟
الفدائي : اه مش عارف أنا عامل ايه .. مش عارف ان كنت مبسوط ولا زعلان .. او كنت كويس ولا تعبان .. والموضوع ده مش مقلق خالص .. المشكلة انه بس مضغوط

لما تلاقي الفدائي بيعيط وبعدين فجاة قاعد يضحكككككككك.. او يضحك بصوت عالي وفجأة ضحكه بقى عياط هسيتري .. لو عيط من غير سبب أو ضحك من غير سبب .. لو مر بأي حالة من الحالات دي .. اوعى تقلق .. هو مضغوط

الفدائي لو كلم نفسه في الشارع او في البيت أو كلم جهازه أو حتى كلمهم.. اوعى تقلق .. هو بس مضغوط

الفدائي دايما بيتصرف زي الأسد الهصور وهو مضغوط .. لأنه دايما بيتثائب بعمق .. وبعمق شديد.. فهو دائما في عمل متواصل لا ينقطع ما هو فدائي.. على فكرة لو ظهرت عليكم اي من العلامات السابقة يبقى حملتم بكل فخر لقب الفدائيين .. فيومنا يا ولدي مضغوط مضغوط مضغوط

*********************************
حوار مع فدائية مضغوطة

___________________________

في يوم عادي من ذات الأيام.. مافيش اي حاجة فيه مختلفة ... السما لونها أزرق .. وانا انسان زي ما انا ماتحولتش .. والناس بتمشي على رجليها ولما بتستعجل بتمد .. وفي زحمة شارع وفي مترو بيمشي على قضبان.. وفي جهاز كمبيوتر بيهجن كتير وفي مكتب.. كل حاجة ماشية طبيعي الا حاجة واحدة.. اني بس مضغوط .. وفي هذا اليوم الطبيعي المضغوط قابلت مجموعة من الزملا

بتلقائية شديدة قولت : السلام عليكم.. عادي لما تقابل حد بتسلم عليه وتقولة سلام عليكم
واحد من الزملا : ازيك يا مروة

رديت وقلت : وعليكم السلام .. ايه ده.. قصدددددي كويسة .. لا المفروض إني اقول الحمد لله ..
هو أنا المفروض اقول ايه أنا نسيت

وكل ده .. لا لا لا .. مش بسبب اني مضغوطة .. اطلاقا .. بس لأنهم مردوش السلام وانا متبرمجة .. حصل لغبطة في كهربا المخ عندي لما اترد على السلام بتاعي بكلمة ازيك يا مروة.. أنا مبرمجة مخي على شوية حاجات علشان اسيب ليه مساحة يبدع ويفكر فيها .. ما أنا فدائي يا ناس

ما علينا .. الحاجة الوحيدة اللي ممكن أختم بيها حوار زي ده هي اغنية : ونقوم وننام وننام ونقووووووووووووم.. على شغل في شغل

والله لولا القصص البوليسية اللي الواحد بيقراها ماكنش عارف ممكن يلاقي الخبرة بتاعت الفدائيين دي منين.. ولا الأفلام والمسلسلات القومية اللي احنا اتربينا عليها.. دلوقتي أنا فاكرة كل مشهد من اعدام ميت والطريق إلى ايلات ورافت الهجان .. ولا ادهم صبري المعلم الكبير أوي اللي علمني اني اعقد حاجبي وانظر نظرة صارمة وأقول بصوت أجش بعد ان انتهد بارتياع : اللعنة .. فليذهب جميع الأوغاد إلى الجحيم

ولا يسعني الأن غير أن اختم البوست المهلوس بالاغنية الشهيرة للفنان العربي الاصيل المبدع هاني شاكر حين قال بعلو حنجرتة : ولا بنهاااااااااااار ... مش بنهاررررررررر .. ولا بنهار .. هاااارر.. ارر ..ر

هناك 33 تعليقًا:

Salma Amer يقول...

اصمدي يا راما أنت أمل
IOL
في العبور و طلوع الفضاء كمان أنت طول عمرك نفسك تقابلي واحد فضائي
دي فرصتك ان يمكن لما نبقى فضائين ممكن تتعرفي على نصفك الفضائي قبل ما تخطفة بنت من بنات كوكب تاني
راي كمان انك تشغلي جنبك موسيقى خلي بالك من عقلك لعمر خيرت وممكن كمان الفيلم علشان تعرفبي تكملي المشوار
خلي بالك من عقلك يا رما

Abo-Harees يقول...

السلام عليكم
اعتقد انى مستبش لعقلك فراغ دلوقتى وأكيد حتردى على السلام

اختى الكريمه المهلوسه
كلامك حلو وجميل ويدخل القلب
رغم انه كلام مقطع ومبشور ومتبهدل
لكن عذرك معاكى اكيد ده كله من الهلوسه
وكمان انتى نبهتينا وقلتى فى البدايه

بصراحة كلامك شدنى رغم انه مفيهوش حاجه لها معنى حقيقى
لكن انتى باين عليكى تمتازى بالأسلوب الجذاب
ويشرفنى أن تهلوسى بعض الهلوسات فى مدونتى فيكن ليا الشرف بذلك
وحتى استفيد من الهلوسات القيمة بتاعتك
يا أختى يا مهلوسه
اخيكى المهلوش
يوووووووووووووو
نستينى

أخيكى الراعى

شيرين يقول...

فعلا كان لازم تسمي البوست هلاوس فضائي

فضائي فضائي فضائي فضائي فضائييييي

♥ BaToOoT ♥ يقول...

رااااااااااااااااامو
وحشتينى جددددددددددددددددددن
من عندك لحد عندى واكتر بجد
معلشى والله انا مقصر كتير فى حقك
والله رامو النت فصل فتره كده
وانا كنت تعبت تانى عاااااااا
انا شكلى بودع الدنيا دى
بس انا عاوز اموت فى بلدى عاااااااا
وحشتينى اوى
يارب تكونى تمااااااااااام وبخير
ومزاجك وصحتك وكلوووووو
انا مش قرات البوست لسه
بس هقررأه وابقى اجى تانى
ومعلشى مش علقت على البوست اللى فات
عااااااااا
يارب تكونى تماااام
ومش نستينى عااااااا
يارب اشوقك قريبن
بحبك موووووه

Wish I were a Butterfly ... يقول...

نسخة معدلة من أغنية هاني شاكر.. أنا بنهااااار
دي أليق عليّ لأن لقب الفدائي دة فات عليّ من فترة و فشلت في الاستمرار عليه

أسلوبك جميل و مشوق أوي يا راما...عارفة اللي بتمري بيه بس إن شاء الله هانت. انت قلت هتستمري كدة اسبوعين تقريبا و بعد كدة كله هيبقى كويس. صح؟؟ و لا فيه تمديد لفترة الإقامة على الجبهة؟
يارب تبقي كويسة قريب يا حبيبتي :) وترجعي لحضن مامتك بعد أيام القتال العنيف دة

سلام عليكم يا رامو يا سكر

المـــفـــــــقــــــــوعـــــة مــرارتـهــا يقول...

ده القناة دي باين عليها هاتبقي كلها إعلانات
المقدمة بتاعتك دليل علي انك خبيرة الدعاية في القناة

Unknown يقول...

ههههههه

مصر محتجالك يارأفت

والقناة محتجالك ياراما

نوصيكم بالثبات والصمود

وحشاني ، فينك يابنتي ؟

Camellia Hussein يقول...

ههههههههههههههههه
اصمدي يابنتي
اهم حاجة انك بتعملي حاجة انتي بتحبيها
ابكي انزف اموووووووووت
وتعيشي يا ضحكة القناة

صاحب المضيفة يقول...

ربنا معاكم يارب

اخبار القناة ايه بقى


عاوزين نسمع عنها أخبار حلوة قريبا جدا


تحياتي

Beautiful Mind يقول...

السلام عيكم ورحمة الله
اخيراً
تعرفى لما قريت البوست صعبة عليا نفسى

الحال من بعضه ياراما والله
شفتى بقى انا كنت مختفى فين يافندم
الشغل
والضغط
ونام ونقوم ونقوم ونام على شغل فى شغل
والمذاكره
والامتحانات

والله بفتقد المدونه جدا
بس نعمل ايه
مقدر ومكتوب

اتمنى ان حضرتك تكونى بخير
ونصيحه
شوية يوجا
هى الأمل علشان تهدى اعصابك
ومبروك لى ياسين مع انها متاخره
وأخيرا "ان مع العسر يسرا

اه كنت هنسى
queen of the blue world.
"يعنى ملكة الكوكب الأزرق
حضرتك مش ضيقه ولا حاجه
الكوكب الازرق دا مملكتك

Soooo يقول...

لا حول ولاقوة الا بالله
كان بدري عليكي يابنتي والله

النبي ياجرعان اللي يعرف داكتور امراض نفساويه وعصباويه يقوللي
عايزينلحق البونيه قبل ماتلسع تماما

والله لسه في امل


- لما حد يقف يتكلم مع الفدائي في موضوع ما.. والفدائي واقف قدامة متنح من غير ما يقول ولا كلمة وبعدين من غير سابق انذار يسيب اللي بيكلمة ويمشي... تعرف انه سابلو قنبله هتنفجر بعد انسحابه بخمس ثوان




سلامووووووووووز

الحلم العربي يقول...

ايه يا راما كمية التهييس الغير طبيعية دي؟؟
بس فرحتيني بكرة كل الاحساس بالتعب ده يروح لما تلاقي نتيجة تعبك حاجة جميلة
ربنا يوفقك
و انت لها يا راما
و على فكرة انا كمان فدائية زيك
فدائي فدائي فداااااااااااااائي

غير معرف يقول...

هايل يامروة .. الى العمل يابنت .. انت فاضية تطتبي قصص هلاوس ياماما.. انت بتهرجي.. بس بصراحة عجبتني جدا..
ليلى حلاوة

Oma يقول...

feda2y feda2y fedaaaaaaa2y
hhhhhhhhhhhhh
bgd enty mes5aaraa
bas mas5raa cute w sokara awyyy
nasi7a le2ay 7ad yegy hena
5aly balk mn 3a2lak :D:D
ana kol ma bla2iny metan7a w da5la 3la 2aryafa bagy hena wla mara 5azltiny el7amdolelah :))))
eb2y t3lai 3ndi w7shtny commentatk

.:.-=- ELGaZaLy-=-.:. يقول...

ههههههههههههههههههههههههههههه

الف بركة يا رما لا فل ...

مترصش تانى يا فتحى هو كدة وصل,.,,

Beautiful Mind يقول...

ايه ياراما اختفيتى فين
شكلك بتجهزى لتفجير انتحارى
:)
يالا
اتمنى انك تكونى بخير
وربنا يعينك

MarwaAshraf يقول...

Salma Amer
_____________

صامدون صامدون صامدون ... نحن الفدائيون

وبعدين فرصتي ازاي يابنت وانا مشغولة كده ومطحونة وعاوزة أضرب اي حد يقابلني

وعلى فكرة أنا عملت بنصحيتك وسمعت الموسيقى اللي أنا بحبها اصلا .. بس حكاية إني أخلى بالي من عقلي دي صعبة شويتين

شكرا يا سلمتي

MarwaAshraf يقول...

Abo-Harees
__________

شكرا على زيارتك يا فندم اللي إن شاء الله مش تكون الأخيرة.. وبالنسبة لعقلي ده مشكلة لوحده فسيبنا منه دلوقتي

ومدونتك جميلة ما شاء الله.. ححاول أكون من المتابعين ليها ان شاء الله

كرر الزيارة

تحياتي

MarwaAshraf يقول...

شيرين

___________

هههههههههههههه

تعليقك دايما بيضحكني .. ربنا يكرمك وتفضلي تضحكيني كده على طول

تحياتي

MarwaAshraf يقول...

♥ BaToOoT ♥
______________

يا احلى صاحبة ربنا رزقها لراموووووو .. واحشتيني بارتياع يا بنت انت ... وقلقتيني عليكي ... خدي بالك منك بقى وبلاش تزعلي بطوط كتير ... وانا صحيح بقالي قرن مش شوفتك بس إنت دايما على بالي.. ان شاء الله اشوفك قريب جدا

سلامي لبطوط

تحياتي

MarwaAshraf يقول...

Wish I were a Butterfly ...
__________________________

مابقوش اسبوعين بقوا تلاتة وبعد التلاتة في شغل أكتر .. يظهر إنهم صدقوا إننا فدائيين بجد ... ربنا معانا كلنا .. أنا عارفة انك بردوا فيكي اللي مكفيكي .. ربنا يكرمك بالخير يا صاحبتي

وان شاء الله أشوفك قريبا

تحياتي

MarwaAshraf يقول...

حماتــــــــــــي ملاااااااااااك
____________________________

هههههههه... ماشي ياستي ادعي لينا بس بالتوفيق .. وكرري الزيارة

تحياتي وبشدة

MarwaAshraf يقول...

نور

_______-

ده سؤال تسأليه بردوا يا نور.. أنا فين؟ يارتيني أعرف أنا فين كنت ارتحت

هههههههههههه


انا اسفة اني مش عارف أجيلك بس والله غصب من عني وهجيلك قريب ان شاء الله

تحياتي وبشدة

MarwaAshraf يقول...

Camellia Hussein
____________

أبكي أنزف أموت
وتعيش يا ضحكة القناة

هههههههههههههه

والله العظيم أنتوا تعليقاتكم فاقت البوست ... كرري الزيارة يا كاميليا مش تخليها أخر مرة

تحياتي

MarwaAshraf يقول...

صاحب المضيفة
______________

ان شاء الله تسمع أخبار حلوة عنها... ماتنساش بس من دعائك

ربنا يكرمك أوي وشكرا على وجودك المستمر

تحياتي

MarwaAshraf يقول...

Beautiful Mind
_____________

يااااااه.. منور يا بطل ... بس إنت طلعت من الانتحاريين على كده مش الفدائيين بس .. على العموم ربنا يوفقك في غشلك ودراستك وامتحانتك و... اكمل مكان النقط

بالنسبة لليوجا بقى أنا ماليش فيها ... بس بعرف اشتغلني بحاجات تانية مش تقلق

ماتقطعش الزيارات

تحياتي

MarwaAshraf يقول...

Soooo
__________

ههههههههههههههه

ماشي يا عم سوووو شكرا على خدماتك ومبسوطة على فكرة إنك رجعت تتابع المدونة تاني

تحياتي

MarwaAshraf يقول...

الحلم العربي
______________

ههههههههههههه

ربنا يسمعك منك ياحلم وتعبنا مش يروح هدر ...وبما انك أنت كمان فدائية فخلي بالك منك ومن عقلك أوي

وحتوحشيني على فكرة

سلامات

MarwaAshraf يقول...

ليلى حلاوة
__________


انا اسفة يا باشا.. أنا راجعة للفريق تاني وحشتغل أهو ... عاااااااا

ههههههههههه

تعالي هنا دايما يا بنت يا فدائية انت ومش حفتن عليكي واقول انك بتضيعي وقت الفدائيين بالرد على البوستات

:)

MarwaAshraf يقول...

Oma
____

الله يخليكي يا أوما يا جميلة .. انت اللي ثكر سنترافيش وعثل كمان

ويارب دايما تيجي هنا وتلاقي اللي يسرك وسامحيني أنا عارفة اني مقصرة معاكي بس بجد غصب من عني

انا بفرح لما اشوفك ... فتعالي على طووووووول .. اتفقنا ؟؟؟

تحياتي يا بنت أنت

MarwaAshraf يقول...

.:.-=- ELGaZaLy-=-.:.
____________________

ليه بس خليت فتحي يبطل رص .. حرام عليك يا راجل

ههههههههههههه

تعليقك في الجون ومبسوطة بعودتك بجد .. ايوة كده

استمر :)

MarwaAshraf يقول...

Beautiful Mind
___________

أصلي مطحونة في خلاط كبير أوي ومحدش عاوز يدوس على زرار الايقاف

والعملية الانتحارية حموت واعملها بس لسة مخدتش أمر بكده

شكرا على سؤالك يا بطل وان شاء الله أزورك قريب .. اخرج بس من الخلاط وأكون عندك منورة المدونة

تحياتي

ღϠ₡ღأمير الهدوءღϠ₡ღ يقول...

ههههههههههههههههههههه
ههههههههههههههههههههه
هههههههههههههههههه
هههههههههههههههه
ههههههههههههههههههههه


دايما بوستاتك متميزه رائعه مفيش زيها اتنين

^_^