يحكى أنه في يوم من أيام شهر اغسطس الحارقة لعام 2007... نزلت اشتغالة على الانترنت... بالتحديد على مدونة "راما".... وكانت بتقول ... "نفسي أشتري لاب توب واسميه ياسين".. فاكرين
اعزائي المدونين .. عزيزاتي المدونات .. إليكم الخبر التالي
ياسين لم يعد اشتغالة.. ياسين حقيقة واقعة.. صوابعي تتحرك عليه الآن .. وتكتب لكم البوست الحالي
الحقيقة بعد تفكير.. وسيناريوهات طويلة.. قررت إن اشتري ياسين .. لأسباب كتيرة منها:-
إني لاقيت إن الجهاز اللي في البيت .. أصبح سبيل زي "الكولدير" بتاع المية اللي منتشر في الشوارع.. كل من هب ودب بيقعد عليه وكل واحد واستخدامه .. لحد لما الجهاز في البيت صحته تعبت أوي وبقى يا حرام كل يوم قبل الفطار وقبل الغدا وقبل العشا بيزل ليه ويندز.. ومعاه طبعا كل حاجة تضيع ... وأنا اعيطططططط وأقول فينك يا ياسين يا حبيبي
ثانيا : إن المرحلة الحالية من الحياة والشغل والظروف القاهرة تقتضي إنك تعمل شوية شغل في البيت... وطبعا مع الجهاز اللي اتحال على المعاش واللي بقى رجله والقبر واللي كان بيقولي "دلكي ليه راماتي".. "وخالي ايديك خفيفة يا بنتي على الزراير".... "ومش تدوسي على الماوس كتير علشان بصدع".. من الآخر ماكنش ينفع لأي حاجة في الدنيا.. وكنت ساعات بستلف "خيري" اللاب توب بتاع الشغل عندنا بس هو كان مش دايما متاح .. فلما كان بيكون عندنا ضغط شغل كنت أعيطططططططططط وأقول فينك يا ياسين يا حبيبي
ثالثا بقى إني بقيت حد مرتبط أوي بالشاشة وحروف الكيبورد.. بعالم الانترنت والمدونات.. فكنت حاسة باحساس إني ناقصني حاجة.. حاسة باحساس إني عاوزة ياسين في حياتي .. فعقدت أعيطططططططط وأقول فينك ياياسين يا حبيبي
علشان كده حسمت أمري وقولت خلاص أنا هجيب ياسين ..يعني هجيب ياسين.. وطبعا لازم قرار زي ده يلاقي معارضات كتير أوي :-
أمي مثلا تقولي .. حاوشي علشان تجيبي الصيني وأنا أقولها مش لما يبقى في فضائي أبقى أجيب الصيني.. يا سين أولى
وناس تانية تكلمني على الجواز واسعار الشقق والهدوم والدهب وبلاش ترمي فلوسك في الأرض.. يا جماعة أنا مش عندي فضائي ,هي الناس بتتكلم عن الجواز كتير كده ليه
وناس تالتة مجرد تمصمص شفايفها وتعوجها عاوجة غريبة جدا.. ولا تعليق وبعدين شكل الوش مش بيكون محتاج اي تعليق .. الملامح بتقول كل حاجة.. وعلى فكرة وقفت قدام المراية وحاولت أقلد العوجة دي معرفتش خالص
واللي يقولي ما تحوشي يا بنتي وتجيبي ليكي عربية على قدك أحلى
ساعتها افتكرت "كونتا كينتي" في مسرحية "سك على بناتك".. طقم الصيني كان قاعد هنا والأركوبال على الناحية التانية .. وانا كنت على سيرة واحدة .. ما خدوش يا بابا ماخدوش يا بابا
واصريت على ياسين وعملت ليه جمعية مخصوص مع إني حد مبذر مش ليه في التحويش ولا الجمعيات.. وساعتها قولت لصديقة جميلة أوي في الشغل كانت بردوا عاوزة تشتري لاب توب.. إني خلاص نويت اشتري ياسين وهي قالت وانا معاكي وهجيب آدم.. والحمد لله وصل ادم وياسين بالسلامة .. بس طبعا كان في شوية حكايات ظريفة حوالين الموضوع حقولكم على شوية منهم :-
يوم وصول اللاب توب بالسلامة.. ظبطت نفسي والكلام اللي حقولة ليه لما اشوفه والبوست اللي كتبتة ليه مخصوص على المدونة.. وروحت علشان أشوفة وبعدين لما فتحته وكان اللقاء الاول اللي كان نقصة الاتنين ليمون.. وبدأت أعاين وأتعرف.. بصيت على الزراير لاقيت ياسين اللي مش ياسين بحروف إنجليزي بس.. ساعتها افتكرت المشهد بتاع فيلم الحاسة السادسة.. لما احمد الفيشاوي قام مفزوع وقال "ده بيفكر بالصيني.. بيفكر بالصيني".. وساعتها طبعا عرفت إن ده مش ياسين.. وانا ماليش في زواج الثقافات.. ورفضت إني أعلم اللاب الأولاني لغة عربية وألزق عليه ستكريز ويكلمني عربي مقطع.. وكمان عملت نوجه نفس الحركة مع أدم ورفضت المستورد.. وكان ناقص أنا وهي نرفع علم مصر ونقف انتباة ونقول "تحيا جمهورية مصر العربية" .. والحمد لله ظهر ياسين وأدم الحقيقين والزراير بتاعتهم بتقول عربي وانجليزي لبلب
حكاية تانية ..إني اشتغلت الناس اللي معايا في الشغل وقولت لهم : مش تباركولي .. مش أنا قريت فاتحة
بجددددددددد
انا : أه والله .. وحتخطب لياسين قريب
وطبعا الناس كانت بتفرح ليه اوي جدا خالص .. واللي حيقولي مش قولت ليه يا وحشة.. واللي يزعل مني علشان مش كان أول من يعلم .. واللي يقولي والله فرحت لك اوي .. واللي يدعي بارك الله لكما.. وبعد لما احس ان الاشتغالة سبكت
أقوم أفصح عن شخصية ياسين .. وأقول إنه اللاب توب بتاعي .. وساعتها بحس ان الناس عاوزة مدفع بازوكا أو قنبلة عشان يفجروني بيها
مع إن الموضوع بسيط إتنين شهود عبارة عن مارس ليزر وكيبورد وتوكيل من شركة ميكروسوفت ومباركة بيل جست والخطوبة تتم على أكمل وجه دون أي مسألة قانونية.. ولا إيه؟
ومن الحاجات الجميلة أوي .. ان نوجة صديقة اللاب آدم .. كانت بتقولي لو فرضنا إن ياسين بقى حقيقي فعلا.. واتخبطت لواحد اسمه ياسين حتعملي ايه؟؟.. واقترحت عليه إني اعمل "ياسين اس واحد" و"ياسين اس اتنين" .. وتخيلت ساعتها سيناريو الغيرة اللي حيكون بين الياسينين.. خصوصا إني مش عارفة ححب مين أكتر يعني
:P
حكاية تالتة : في يوم دخلت مشرفتي المباشرة المكتب ولاقتيها بتقول : اسماعيل فين اسماعيل؟؟ كلنا طبعا اندهشنا وقلنا ليها : اسماعيل مين
قالت: اللاب توب بتاعي .. يعني في أدم وفي ياسين وكمان في اسماعيل
كفاية رغي وحكايات لحد كده.. الحمد لله إن الاشتغالة بقت حقيقة .. وعقبال الاشتغالة اللي في بالي .. صحيح فلوس الجمعية خلصت على الهدوم بتاعت ياسين وخاتم حبنا وصحيح انا قدامي لسة سنتين عقبال لما اخلص ديون الاستاذ.. بس مش مشكلة .. المهم إننا سوا ... وكله يهون علشان خاطر عيونة .. في الاخر هو اللاب توب وهو بابا وماما وخطيبي الالكتروني وحبييي وصديقي
اللي في الخير ودعا لراما إنها تشوف ياسين .. يدع ليها تاني انه يحفظة ويحفظها ويبارك ليها فيه ويقدرها على ديونة.. وتعدي مرحلة التعارف دي على خير .. ويكون بينا كميا كويسة.. ويدع لأدم واسماعيل كمان وعقبال عندكم
هناك 43 تعليقًا:
أول تعليق
نقولك مبروك ولا نقولك حمد لله على السلامة لياسين
على العموم
ربنا يبارك لك فيه ويرزقك خيره ويصرف عنك شره يارب
دمت بسعادة مع ياسين
هههههههههههه
أعسل راما شوفتها في حياتى
بجد التدوينة دي تحفة
ألف مبروووك يا راما و عقبال ياسين الفضائي عن قريب يا رب و ما يهمكيش من طقم الصينى هو هييجي لوحده ...
انا كمان اليومين دول بقيت محتاجة ياسين أوي بس انا مش هسميه ياسين علشان تشابه الأسماء انا هسميه عبقرينو
انتى عارفة اني دعيتلك لما كتبتى التدوينة الأولانية صحيح انا كانت نيتى ياسين تاني لكن ربنا يسهل أول الغيث قطر ثم ينهمر
ربنايباركلك فيه بجد و تستفيدي بيه و تحققي بيه كل طموحاتك
سلام يا قمر
:))
أه نسيت اقولك صحيح :
الاشتغالة اللى اشتغلتيها للناس اللى في الشغل دي جامدة اوي انا لو منهم كان جالى شلل رباعي يا بنتى
ههههههههه
بس بردو عسل :))
مبرووووووووووووك
وعقبال ميجى ياسين ابو لحم ودم
انتى كده دخلتى عالم التكنولوجيا
الف مبروك وحوشى بقى للصينى
مبروك فرحتلك بجد..لأن الوجيعة واحدة والحالة الصحية للأجهزة واحدة
حلو البلوج على فكرة موووووت..خصوصا خزاعة وكليب بطني وجعتني من كتر الضحك
:)
مليون مبروك يا راما يا جميلة بجد فرحتلك قوي
ولازم تعرفيني على ياسين خدي منه ميعاد وقوليلي اعدي عليكي اشوفة
ربنا يبارك ليك في ياسين وعقبال كل اشتغالاتك ما تبقى حقيقية وتقدري تلمسيها بأيدك
خلي بالك من نفسك ومن ياسين يا راماتي
تسمحي لي يا راما أقولك حاجة بس في البداية، بعد إذنك طبعا، بصراحة انتي فقرية أوي (:
وبجد ألف مبروك يا راما على قدوم ياسين، بس أوعي تنسي الصيني فعلا، عشان نفرح بياسين اللي بجد بأه... ربنا يفرحك دايما يا راما
أخوكي أيمن
هاهاهااااي
مش بقوللك إنت اللي بنت سكرة؟ :) بجد دمك خفيف مووووت
المهم إني عارفة معظم القصص اللي قلتيها فهكتفي بأني أقوللك مبروك مبروك با رامووو
و بجد والله فرحت جدا جدا لما اتأكدت إنك جيبتيه
:)
عقبال ياسين الفضائي الضفدوع اللي من العالم الخيالي اللي أكيد هيكون جميل أوي زيك.بجد تستاهلي كل الخير يا راما. ربنا يباركلك في ياسين و يصرف عنك شره
بس بجد بجد بوست لذيذ أوي و فرحني كتير :) مبروك عليكي ياسين و على صاحبتك آدم..عقبال الجميع
:$
سلامات
ضحكتيني يا بنت يا راما ..
ألف مبروك ياسين .. و عقبال ما يوصل الفضائي بالسلامة ، و نباركلك برده من غير اشتغالات :)
الف مبروك
زغروووووووووووووووته للحابيب و الجاران ياسين وصل يارجاله لاوايه اجنبى كمان
الف مبيروك ومنسيش تعزمينى على الفرح علشان نتعرف على أصحابه من الانواع الاخرى
عادل طوبه
صاحب المضيفة
__________
يارب دايما تكون مبادر وتكون أول تعليق .. وشكرا بجد على دعائك ربنا يسمع منك يارب
دمت بسعادة مع من تحب :)
الحلم العربي
______________
ههههههههههه
حلمون الجميلة .. ايه يا بنتي التعليق اللي يخلي الوش يحمر ده.. ربنا يبارك فيكي يا حلمون يا جميلة ونبارك ليكي على عبقرينو قريب
_______________
حلمون مرة تانية
هههههههههه
كان نفسي تشوفي الأركشن زي ما بيقولوا "رد الفعل" ... بس انت عارفة الاشتغالات هي حياتي أصلا .. بحبك على فكرة
بطوط حبوب
_________
ربنا يا سهل يا بطوط.. كل حاجة وليها وقتها.. بس لما يشرف أبو لحم ودم ده
ممكن أعضه أول لما اشوفه علشان أتأكد هو حقيقي ولا لأ
هههههههههههههه
شكرا على وجودك.. مش تحرمنا منه يا فندم
تحياتي
بيسوو
________
ربنا يجعلنا يا بيسو سبب في رسم حتى ولو بسمة بسيطة على وشوش الناس .. شكرا على التهنئة وشكرا على الزيارة .. مستنية زيارتك الجاية
:)
تحياتي
Salma Amer
___________
سلمتي الجميلة اوي جدا خالص
شكرا شكرا شكرا بجد.. وياسين بيسلم عليكي من قبل لما يشوفك وهيجي لحد مكتبك قريب إن شاء الله
ربنا يكتر في حياتي اللي زيك يا طيبة
:)
أيمن
______-
كلمة فقرية دي بتتقال ليه كتير وفعلا فعلا نفسي اعرف ايه معناها.. يعني ايه فقرية دي.. ها؟؟؟
شكرا يا أيمن على وجودك وزي ما قولت لبطوط كل حاجة بوقتها .. شرفني دايما
Wish I were a Butterfly
_______________
بندقتي اللي مش عارفة أشوفها.. شكرا بجد على فرحتك دي وعقبالك علشان عارفة انك كمان عاوزة تيجيبي واحد قريب
يارب يكون في بيتك قريب وتسميه اسم حلو زيك
نورتيني أوي وعملتي قفلة من كتر النور
:)
آية مش هنا
_____________
هههههههههه
ربنا يكرمك يا ستي .. بس انت ادع لي كتير وكله حيبقى تمام
بس انت مش هنا ليه وروحتي فين ؟؟؟
شكرا يا آية على وجودك وياريت تكرري الزيارة
تحياتي
عادل طوبة
________
ههههههههههه
أكيد حعزمك على الفرح بس انت الأول يا بطل ولا ايه؟؟؟ أنتم السابقون ونحن اللاحقون
شكرا بجد على المباركة وعقبال لما نباركلك في أولادك
:)
كرر الزيارة
مبرووووووك يا حبي ؛)
الإمضاء
شنوبي
:))))))
الف مبرووووووك ياجميل
عقبالي
حطيه ف عنيكي بقى
اللهم بارك لها فيما رزقتها
راما
.......
وحشتيني
أوي
.......
و بس
هههههههههههههههههههههههههههههه مبروك عليكي ياسين أس واحد وعقبال ما يجيلك ياسين أس اتنين.
حمدلله على سلامه ياسين ويارب يكون قدمه خير عليكى يارب وتستخدميه فى تدوينات جميله يارب
شيرين
ههههههههههههههههههههههههه
عقبالك يا شنوبي
:)
نور
________
طولت الغيبة يا نور ... ايه يا بنتي كنت فين ؟؟
على العموم ياسين في عيني وقلبي وعقلي وربنا يباركلي فيه فعلا
شكرا على دعائك ربنا يسمع منك
مش تتأخري عليه تاني
تحياتي
Wish I were a Butterfly ...
__________
إنت أكتر
وبس
(F)
عايش مع إيقاف التنفيذ
____________________
هههههههههههههههه
اللهم أمين
رئيس جمهوريه نفسى
______________
يارب ياسيدي الرئيس يارب .. وعقبالك إنت كمان
شكرا أوي جدا خالص
تحياتي
أنا متأسف والله
مش قصدي خاااالص
بس سامحيني يعني اني هقول كده
ههههههههههههههههه
يخرب عقللللللللللللك
اولن مبروك على ياسييين
ووالله ياسين احسن يا شيخة جواز ايه وكلام فاضي ايه
متبصيليش يعني انا... انا مبسوط والجواز معايا لذيذ وكل حاجة .... بس انا بتكلم عليكي يعني ههههههه
بلاش وجع دماغ وصيني ومش عارف إيه
بس جامد البوست ...تسلم افكارك يا دكتوووووور نفيييييييسة
ههههههههههههههه
ربنا يباركلك فيه وعلى رأي جورج قرداحي
اصرفهم في الخير
على فكرة انا بموت في اللابات جدننننن لكن طبعا بما إني ناااو واد مخبوط ومرتبط فمفيش مجال للتكنولوجيا نيفر على الرغم من إن العروسة بييييس جدن وممكن ندلع نفسنا ونعيش في الشارع ومعانا موبايلاتنا ولاباتنا وكده
لكن بعد موضوع ياسين وآدم دول أنا عمري ما هجيبلها واحد تخونني معااه
ههههههههههههههه
جميل البوست بجد
تحياتي
ya 3asaaaal :))))
ente bgd ya benty 3asl
mabrok ya 2amr w rabna yebarelk fe 3omro w yehane sa3ed besa3ida :D
مبروك على ياسين
ويتربي فى عزك ان شاء الله
مبارك عليك ياسين
وهو أفضل في تحقيق هدفك في البوست الماضي يعني هيروشك ويغير روتين حياتك
لكن حاسبي يجيلك منه أتب
وبخريه بأحسن أنتي فيروس
وهديتك عليا طبعا فلاش ميموري
ثم المقارنة جائرة بين اللاب توب والصيني
هو لسه في حد بيفكر في الصيني الناس بتاكل في أطباق ورق عشان الموظفات مش لاقين وقت يغسلوا الأطباق وبكده بيوفروا مية وصابون ويدعموا البيئة لو كانت الأطباق قابلة لإعادة التدوير
:)
sakayar
__________
ههههههههههههه
معلش سامحني .. بس غصب من عني بجد .. مش قادرة ماقولش كده بعد لما قرات التعليق بتاعك
يخرب عقلك إنت
هههههههههههه
انت على طول كده... مش ممكن بجد
ما علينا.. على فكرة يعني معلومة مهمة جدا.. يجوز ان بطوط تجمع بينك وبين ياسين.. وياسين معجب بيها أوي وبعقلها.. وبيبعت ليها ورد وسلامات وياهناه يا سعده لو كانت معايا على الماسنجر
أنا بس بهدي النفوس مش أكتر
وبجد.. القهوة نورت بيك تاني .. أيوة كده .. في ذمتك مش البلد دي أحسن من غيرها
ربنا يبارك فيك.. وفي عروستك.. تحياتي
Oma
_________
my cute oma
بفرح لما بشوفك عندي يا بنت يا سكر إنت .. ربنا يهنيكي باللي بتحبية
شكرا بجد على وجودك
TheRiddle
____________
هههههههههههههه
ماشي يا سيدي .. الله يكرمك
عقبالك لما نشوفهم بيطنططوا حواليك
:)
سكينة
__________
ههههههههههههههه
والله العظيم إنت جامدة يا سكينة ..حاضر ياستي حبخرة مني .. هو برامج الحماية فية عالية جدا على فكرة .. حتى مني يعني
وحلو أوي موضوع الأطباق الورق ده .. والله العظيم إنت دماغك عالية أوي
بحبك يا إنت
:)
ربنا ياوفقك ياراما
مبين عليكي بنت طيوبة وحبوبة
والله سعدت بزيارتي لمدونتك وياريت تشرفيني بعالمي الخيالي
تحياتي
أنثى الخيـــــال
_________________
اهو إنت اللي طيوبة وحبوبة ... سيماهم في التعليق بتاعهم يعني ...
:):)
ربنا يكرمك يارب.. وحاضر ده شرف ليه إني أزور مدونتك .. حنورك قريب إن شاء الله
تحياتي
تصدقي انتي كاتبه ساخره حلوة قوي وانا ماكنتش واخد بالي
بجد موضوع خفيف ولذيذ جدا
والف مبروك ياستي وتعيشي وتدوبي
عقابلي لما اجيب فتكات .. قولي يارب
سلامووووووووووز
sooooo
________-
هههههههههه.. بعض مما عندكم ياسووووو.. ربنا يرزقك بفتوكة حلوة قريب يارب
شكرا على مرورك
مبروك عليكي ياسين يا ستي والله فرحتيني
انا عديت هنا من زمان وكانت صورة الاب توب محطوطة وانتي بتدعي انك تجيبي ياسين
بارك الله لكما وبارك عليكما وجمع بينكما ف يخير
إرسال تعليق