العنوان صح جدا ... أيوة أنا كاتبة توست بالفول ... مافيش داعي للنضارة .. أيوة العنوان "ت و س ت ب ا ل ف و ل".. وحبدأ كلامي معاكم بسؤال بسيط أوي ... جربت تاكل توست بالفول قبل كده؟؟
سؤال غريب .. وأكيد إنتوا مش عارفين أنا ليه بسأل سؤال زيه ده؟؟
فكر في يومك شوية كده .. أكيد مش مختلف عن يوم صاحبك .. وأكيد مش مختلف عن يومي .. حاسة إن كلنا عبارة عن فيلم محطوط على شريط فيديو وكل شوية تعمل إعادة .. لحد لما زهقت
تصحى الصبح من النوم بعد عذاب طبعا ... والمنبة يكون صوتة إتنبح .. ويحلف ميت يمين إنه مش حيصحي شخصية زيك تاني .. بس طبعا المنبة "مجبر اخاك لا بطل " .. والحل الوحيد علشان يخلص منك إنه يموت وساعتها حتروح تدور على منبه تاني تعذبه معاك.
بعد لما تصحى .. تدخل الحمام تكمل نوم جوه شوية ... تخرج تشد اي حاجة من الدولاب .. مش مهم تكوي لأنك كده كده حتركب المترو أو الاتوبيس أو الميكرباس وكلها حتقوم بالواجب وزيادة ومعاك ... إحساسي وانا نازلة من المترو كل يوم إن الغسالة الاتوماتيك كانت شغالة على العصر .. البنات طبعا عارفين الهدوم بيبقى شكلها عامل إزاي أما الولاد فبطلب منهم يكتشفوا بنفسهم
المهم تنزل من بيتك مكشر وشايل على رأسك طاجن ستك.. وشايل اسلحتك ومستعد لأي خناقة... تمشي من نفس الشوارع ... تركب نفس وسيلة المواصلات اللي بتركبها كل يوم... تشوف نفس الناس اللي بتنزل معاك كل يوم الصبح في نفس ميعادك .. تروح الشغل تعمل نفس الحاجات اللي بتعملها كل يوم .... تاكل نفس الأكل .. تشرب نفس الشرب .. تسلم على نفس الناس ... وعلى آخر اليوم تروح .. تعبان .. هلكان .. جعان ... تاكل وتقوم بحاجات بسيطة وتنام... وهكذا كل يوم ... مجرد دوسة على زرار التشغيل ويتكرر بنفس التفاصيل .. وهلم جرجر
إيه الملل ده يا جماعة .. أنا نفسي زهقت من الكلام اللي أنا كتباه فوق ده .. متخيلين إننا عايشين جوة التفاصيل المملة أوي دي ... وعمرنا مش بنغيرها ... وكأننا مبرمجين عليها
اكيد بتقولوا دلوقتي .. ايه علاقة الكلام ده بتوست الفول ؟؟
أقولكم .. فكرت في فكرة بسيطة علشان الملل والدوامة اللي إحنا عايشين فيها .. فكرت إننا كل يوم نبتكر حاجة جديدة ... تفصيلة صغيرة بسيطة ومختلفة... تدخلها يومك .. وكل يوم تدخل تفصيلة تانية مختلفة عن اليوم اللي قابلة ومع الوقت حتحس بالتغيير.. حتحس إنك كل يوم بتتفرج على فيلم جديد.. بس البطل فيه واحد ... هو إنت طبعا وممكن تحتفظ معاك بشوية شخصيات ثابتة جوة فيلم حياتك اللي إنت فيه المخرج والبطل وكاتب السيناريو وممكن يكون معاك مساعدين.. مش هي دي المشكلة .. المهم إن الحكاية حتكون مختلفة
يوم حتاكل توست بس حتحط عليه فول مش جبنة ولا لانشون
يوم تاني كل عيش بلدي .. وحط جواه همبورجور او سويس أو بيف
يوم تالت حتعمل ورقة ... ترسمها بنفسك أو تعملها على الكمبيوتر ... ارسم عليها وش بيضحك وأكتب عليها مثلا(صباح الخير يا... ).. أو اكتب عليها (ابتسم من فضلك)... أو إكتب عليها (وحشتيني يا أنا) .. علقها على الحيطة اللي قدامك او على السقف .. الحاجة اللي عينك بتقع عليها أو لما تصحى.. وممكن تعمل منها نسخة تانية حطها على باب البيت ... علشانك وعلشان أسرتك وأهو كله بثوابه يعني.
يوم رابع .. تغير مسيرتك .. لو بيتك قريب من الشغل جرب تصحى يوم واحد بدري (ومش تكررها تاني علشان مش تكره نفسك وتكرهني أنا عارفة إن الموضوع صعب ).. وخدها مشي وبلاش تركب وسيلة مواصلات .. او إمشي من شوارع مختلفة .. أو إركب وسيلة مواصلات مختلفة والبهدلة واحدة .. عادي جدا
يوم خامس إلبس لون جديد .. أو غير ستايل لبسك ... دي مرة واحدة في السنة .. علشان فلوسنا احنا مش لاقينها اصلا
يوم سادس .. تقول لنفسك أنا حبتسم مهما حصل .. خالي شعارك الابتسام.. ابستم لكل اللي تقابلة تعرفة أو ماتعرفوش.. في غيرك حيبتسم ليك علشان الابتسامة معدية وأكيد ناس تانية حتقول ايه المجنون ده .. مش مشكلة .. مجنون بس مبسوط
جرب كل يوم خميس تعمل حاجة مختلفة بعد الشغل .. إمشي .. أخرج ... أكيد حتلاقي حاجة مختلفة تتعمل
وكل يوم فكر لنفسك حبيبتك في حاجة.. أكيد حتفرح منك أوي وحترضى عنك وإنت كمان حتفرح معاها وحتفرح معاك ناس كتير .. علشان السعادة معدية خصوصا للقريبين منك أوي.
وعلى رأي اللي قال : هي الحياة ايه غير توست وفول وشوية تفاصيل تانية فوق بعض
انا مستنية اسمع منكم .. اللي موافق على الفكرة يبتكر معانا أفكار جديدة بس تكون بسيطة وسهلة ويساهم في صناعة يومنا وعلى فكرة أنا بدأت بنفسي وكلت توست بالفول .. طعمة جميل أوي وفرق معايا جدا
:)
لمزيد من التفاؤل طالع : هكونا ماطاطا
هناك 36 تعليقًا:
تصدقي يا رمرومتي ان انا من زمان وانا غاوية توست بالفول مش قصدى على اكل التوست بالفول اقصد ع الفكرة نفسها دايما اكتر حاجة تسعدني هى الحاجات المفاجأة اللى بتيجي من غير ميعاد لكن للاسف مشكلتى ان المجانين اللى حواليا قليلين
بس بجد عندك حق لان اى تغيير ف نظام اليوم بيفرق كتير
واضافة لافكارك ممكن الرياضة اي رياضة حتى لو كانت تمارين سويدي قبل النوم عشر دقايق بس هاتعمل Refresh للجسم والدماغ وتخليكي تنهاري في نوم عمييييييق
حلوة اوي فكرة التوست بالفول دي يا رامو
التغيير شئ جميل و بجد أسوأ إحساس بحسه انى دايرة في ساقية و ان مفاتيحي مش في ايدي في ايد الروتين
انا قررت أعمل توست بالفول كل يوم و هسمع كلامك
إن شاء الله هجرب الفكرة و هقولك على النتيجة شكرا يا ميرو يا صديقتى المتفائلة
:):)
:)
و بس
هجيلك تاني يا راما
ههههههههههه
ربنا يوفقك
ماشاء الله مدونه جميله
تحياتى
فكرة مفتكسة ولذيذة
ومقتنعة على فكرة إنها بتفرق
ممكن كمان نخلى فى كل إسبوع جزء من المرتب أو المصروف أو أى حاجة يعنى نجيب بيه هدية لحد إحنا بنحبه
هتفرق معاه جدا ومعانا أكتر
حاجة ع الماشى
طريقتك فى التسلسل جميلة بجد
محستش فى النص إن أنا مليت
بجد بوست لذيذ جدا و في مكانه تماما لان كلنا زهقنا من رتم الحياة الممل اللي بنقوم بيه كل يوم و مش كل يوم و بس دا ديه مشكلة اكبر لما يستمر ايقاع الحياة ده لسنين و سنين بتخلي الواحد يحس ان هوا بئى مجرد حركة منتظمة بتقوم بيها الحياة يوميا و الحركة المنتظمة ديه اللي هي احنا .. لكن بالرغم من ان التغيير ده بيكون صعب شويه لان كل واحد سستم نفسه على الايقاع ده اللي هوا اختاره اصلا من البداية يعني مثلا فطريقي المعتاد لشغلي سستمت حياتي على طريق معين و فكرت مرة اني اغير المسار و بيني و بينك كرهت اليوم اللي فكرت فيه في الفكرة ديه اللي عايز اقوله ان ساعات التغيير مش بيكون لذيذ يعني بالرغم من اني اتفق معاكي تماما في ضرورة اضافة بعض الحاجات في حياتنا كل يوم علشان نكسر الايقاع الممل ده لكن ديه هتكون في ايد كل شخص بالنسبة للتغير اللي هوا عايز يضيفه على حياته يعني اقصد الموضوع نسبي الا ان الافكار اللي طرحتيها لذيذة جدا .. على فكرة ديه اول زيارة ليا للمدونة الجميلة ديه و الحقيقة اعجبت جدا بطريقة سردك و نظمك للكلام و اللي متأكد منه انها ان شاء الله مش هتكون اخر زيارة .. تحياتي الشديدة لحضرتك و اتمنى اني مكنش طولت بس بجد الموضوع يستاهل .. يلا سلام
بيب بيب
راماااااااااا
ازيك؟فيييييييينك؟ قلقتينى عليكى بجد
يارب تكونى تمامون
معلشى انا جايه بسرعه وماشيه
بس قرأت البوست
وعجبنى جددددددن
وهشاركك فيها لما اجى تانى
بس المهم ناو
انا بعت لك الميل على الايميل اللى انت سبتيه عندى
من امبارح عااااااااااا
ومش عارفه انتى فييييييين
عااااااااااااا
وعندى مفجأه على بلوجى
عاااااااااااا
حلوه
هههههههههههههههههههه
بس بسرعه قبل مااسافر روحى شوفيها او ضفينى
يارب الحق اشوفك قبل ماسافر بجد بقى
او قولى لى مواعيدك وانا هستناكى ضرورى
موووووه
فى رعايه الله ياراماااااا
مستنياكى كتيييييييير
حبيبتي راما
جميل أوي البوست بتاعك :)
و بجد إنت دمك خفيف و روحك جمييييلة أوي ماشاء الله
ربنا يديم عليكي نعمه كلها... وتكوني دايما سبب في محاولة إسعاد الناس اللي حواليكي
بس بجد دمك خفيف أوي :)))
بس عارفة؟؟ أنا فعلا كل شوية أغير نظامي في حياتي.. ساعات تتمشي الصبح أوي قبل الشغل، ساعات سويدي في البيت كفاية، ساعات تيجي في دماغك و تروحي أيروبكس...كدة يعني
كمان موضوع الطريق للشغل دة أنا جربتها وبجد بتفرق أوي إنك تغيري طريق و طريقة ذهابك و إيابك
و ياستي لو على نفس الناس اللي بتقابليها كل يوم.... :$ ممكن أعمللك مفاجأة وتقابلي حد غير اللي بتقابليهم كل يوم بعدالشغل لو حبيتي
;)
شكرا على البوست دة أوي..هقوللك إني مقتنعة بس بصراحة معظمه مش هعرف أطبقه الأيام دي :(
و بمناسبة إنك تفكري في حاجة تسعدك كل فترة... قريب "اتحايلت" على أخويا ننزل 12 ونص بالليل عشان نفسي أجيب شيكولاتة و أدلع نفسي :) و قعدنا نلف في الشوارع كتييييير وقتها. بجد حاجات بسيطة بتفرق. يارب دايما تبقي متفائلة يا راما
تسلم إيدك ع البوست الجميل اللي زيك دة
مقالة جميلة من انسانة جميلة
الى الامام دائما
فكرتيني بنكتة ظيرفة: بتقول
كان فيه وحدة مذيعة بتسأل واحد انت بتعمل ايه لما تقوم من النوم لغاية ما تنام.
قال: أنا بصحى من أم النوم
اغسل ام وشي
البس ام الهدوم بتاعتي
اخرج من ام الشقة
اركب ام الاتوبيس
اروح ام الشغل
ارجع من ام الشغل
اركب ام الاتوبيس تاني
ارجع ام البيت
أكل ام الأكل وأنام في أم السرير
فالمذيعة ردت وقالت
شكرا ويلعن ام وش اللي يعمل معاك حوار تاني
عامة التغيير مطلوب، بس هي المشكلة فينا احنا لاننا لما بنتعود على نظام معين بيبقى زي الروتين اللي مش عايزين نغيره، وعلشان كدة دايما بنحس بملل وقرف.
بوست كميل
وتقبلي مروري
مصري بالإمارات
قديييييييييييييييمة :P
كلته وأنا عندي سبع سنين تقريبا :D
بس فكرة البوست "لذيذة" أوي
أنا جربتها فترة وبتفرق فعلا، بس ما جربتش أعمل زيك وأقولها لغيري ..
برافو عليكي بجد
نقطة مهمة بس حابب أعلق عليها..
انتي قايلة في النص :
"وكأننا مبرمجين عليها"
مالهم المبرمجين؟!!!
:D
ساقية الحياة
كلنا تقريبا واقعين فيها بنلف في نفس الطريق ومش بنوصل اخرة ابدا وكل يوم نفس المناظر بنفس الريتم
انا عن نفسي اكتر حاجة بتخليني اخرج من المود دة اني لازم افتكس حاجة جديدة
ادخل المطبخ مثلا اجيب وصفة واغير فيها وافتكس واطلع حاجة مختلفة كدة يعني
بس عمري ما عملت فكرةان كل يوم احاول اكسر الملل بحاجة مختلفة
نجرب ونقلك
تحياتي
جربي العيش الكيزر...مع فول مصفي..و
بيض اومليت...طبقة و طبقة..مع خس وطماطم....و قليل من النعناع الجاف.
و ايضا حتي تغيري قليلا...من الملل...حاولي ان تغيري من الطريق او وسيلة المواصلات...من الموعد...استيقظي مبكرا قليلا...و انزلي مبكرا..
يوم الاجازة...حاولي ان تخرجي الي مكان
هاديء...او زيارة عائلية...او حتي
زيارة ملجأ....
اخر شيء...استقطعي من راتبك مبلغ بسيط...و حاولي يوم بعد اخر ان تخرجي منه صدقة....سيكون يومك ان شاء الله له طعم مختلف.
تحياتي و تقديري
هههههههههههههههههه
توست فراخ
اناهعمل توست فراخ
واحط كاتشب مرة
ومرة هحط نسكافيه
ههههههههههههههه
والله دي تبقى حياة توست خالص
ههههههههههه
التوست
قصدي البوست لذيذ
والله انا متابع جيد جدنننن
لكن معلق قليل الحضور جدننننن
عااااااااا
معلش بقى والله ظروف العمل والحياة
هههههههههههههه
رب يسعدك
وحاولي تاخدي بالك من لما نصحى م النوووم
بحب اقراها عندك كتير
اصلها بتفكرني بمدونة اعرفها
ههههههههههههه
اسمها الحياة... لما نصحى م النوووم
yuyo
---------
إنت حتقولي ليه يا يويو عنك.. أكيد طبعا إنت ليكي في التوست أبو فول وأبو طعمية كمان .. وبعدين لو المجانين اللي حواليكي قليلين قولي ليه وأنا اكتر منهم ... زي ما أنت عارفة الوصول ليهم عن طريقي سهل جدا ... بس إوعي تدع عليه بعده كده.. شكرا على الاضافة .. الرياضة فعلا حاجة مهمة أوي وكمان سهلة... وصحيح عودا احمد.. واحشني تعليقاتك وكلامك .. تحياتي وبشده
الحلم العربي
------------
حلمي اللي بقى حقيقة ... قرارك بإنك تعملي التوست بالفول قرار حكيم جدا .. نؤيدك فيه وبشده ... وإن شاء الله مش تندمي عليه أبدا...
بحبك يا ماي دريم
نورتي
Wish I were a Butterfly
___________
مستنياكي
:)
وبس
Hosam Yahia حسام يحى
_______________
الله يخليك يا حسام.. ده من ذوقك .. كرر الزيارة
فزلوكة
_______
بنوتة فزلوكة .. فكرتك حلوة أوي .. والهدية ممكن تكون ليكي بردوا ... على اساس إنك بتحبيكي ... شكرا على الكلام اللي على الماشي ده ... في الجون على فكرة .. وشكرا على وجودك يا سكرة
shreef
______
بالنسبة لمسألة التغيير اكيد مش سهل وعلشان مش نتعب لازم نشوف طريقة سهلة وده اللي أنا حاولت أوصله ... وأكيد زي ما قلت اللي ممكن يناسبك مش حيناسب غيرك يعني .. المهم التطبيق ومش مشكلة أي حاجة تانية.. أبدا واحدة واحدة وبراحة .. وإن شاء الله كله حيكون تمام
بجد نورت .. وإن شاء الله مش تكون دي أخر مرة .. وكلامك حلو أوي وطول زي ما إنت عاوز .. البلوج بلوجكك يعني ..
تحياتي وبشده
♥ BaToOoT
_______
أحلى بطوط في كل البطابيط في اللي في دنيا
وحشتيني أوي .. ربنا يجيبك بالسلامة .. ومعلش على الغيبة بس أنا دايما مشغولون ... شكرا أوي على كل حاجة .. ومستنية أشوفك قريب جدن جدن جدن
بحبك بارتياع
Wish I were a Butterfly ...
______________
بندقتي الجميلة
ايه الأفكار الجامدة أوي دي ... طبعا ليه الشرف إني أعمل توست بالفول وأقابلك .. أكيد حتفرق معايا أوي وبالنسبة يعني إنك مش قادرة تطبقي كل اللي فيه دلوقتي .. مش مشكلة .. المهم انك مقتنعة ... وواحدة وواحدة.. التغيير حيعم الحياة كلها
شكرا على أفكارك الجامدة ... تحياتي
TheRiddle
____
شكرا يافندم .. أخجلتم تواضعنا... كرر الزيارة
في حب مصر
------------
هههههههههههههههههههههههههههه
لا بجد ... لا حقيقي ... لا مش ممكن
نكتة جامدة أوي ومعبرة اوي
شكرا عليها بجد
تعليق كميل .. وياريت تكرر المرور
تحياتي
مصـ( الخير )ـعب
___________
يااااااه يا مصعب .. أنا قلت إنك مخاصم المدونة وحالف ميت يمين مش تدخلها تاني ... ههههههههههه
وطبعا لازم تكون جربت التوست بالفول ... الفكرة مش ممكن تعدي على شخصية زيك أبدا يعني
وبالنسبة للمبرمجين ... اجدع ناس والله ... بس أنا كنت أقصد إن البرمجة للألات مش للبشر .. ولا إيه؟؟؟
نورت بجد .. تحياتي وبشدة
Salma Amer
____________
حلوة فكرة المطبخ دي ... يعني الأكل حاجة ضرورية زي ما إنت عارفة
نورتي يا سلمتي الجميلة وشكرا على وجودك
الربان
_____
هههههههههه
ايه طبق اليوم ده يا ربان ... على العموم جزاكم الله خيرا .. على طبق اليوم وبقيت الأفكار التانية اللي حتنفعنا دنيا وأخرة .. شكرا على وجودك وكرر الزيارة
sakayar
________
توست فراخ بالنسكافية ... انت شكلك قريبنا وإحنا مش عارفين ... هههههههه
ماشي ياسيدي .. عفونا عنك.. بس وجودك الحقيقي يهمنا ... بلاش دور الطاغية الخفي ده لو سمحت ... والحياة لما تصحى من النوم في العين اليمين قبل العين الشمال يا فندم
شكرا على الاستجابة السريعة بجد
تحياتي
بالنسبه للفكره كلنا بنكون فى حاجه للتغير وقتا ما وياريت يكون بصوره متجدده
بس ليه سوال عرضى هو ايه الفول ؟ بما انى عارف التوست يعنى وش بيضحك
يا أما انت أنا وأنا مش عارفة يا أما الناس بقت تفكر زي بعضها قوي من كتر ما هي في مركب واحدة
موضوع التغيير انا تبنيته لحد ما بقى ممل بس بينفع
يا عني في اسكندرية
ممكن اروح من شغلي بحر بكه عن طريق ابوقير
ممكن والصيف طالع الناس اللي بتروح قبل المغرب
ممكن يعملوا زيي
انا احيانا مش ع طول
اصلى العصر وانزل من المكتب في عيادة نفسية اسمها الترام الزرقا
اركب ما تترددش
الترام من فيكتوريا لحد محطة الرمل ليه طعم والعكس طعم تاني خالص
خد معاك اكله بتحبها وما فيش احسن من سندوشت الفول
او الكبدة هوهو
ممكن كمان تنزل من الترام تروح على عيادتي النفسية التانية في شارع فؤاد
قصر الابداع ولو ني عارفة حلاقيكم كلكم هنك بس مش مهم
المهم انك تقدر تقعد هناك من غير اشتراك ولا يحزنون كتب من جميع الانواع ادب انجليزي مترجم على روسي على عربي على نجيب محفوظ على خيري شلبي
على كتب دينية وتاريخيم من اللي قلبك يحبعا
ساعة الصلاة بقى بيفتحوا قاعة السينما نصلي فيها جماعة لو ما لحقتش قدامك جامع العطارين
وانت راجع ما تنساش تعدي على شارع النبي دانيال
هي دي عياداتي النفسية
بس فين الوقت
فكرة رائعة
ابتكار فظيع
انا سعيدة جدا باكتشاف مدونتك
و انك اسمك راما زي صحبتي الانتيم
باييي
والله انتي دماغك عاليا جدا
و بالمناسبة
انا وحشتني و بحبني قوي
ست البيت
__________
ايه ده اسكندرية مرة واحدة.. ده إنت ممكن تعملي كل ثانية توست بالفول
اسكندرية دي حاجة تانية خالص.. ده كفاية يا بنتي أروح الشغل وأمشي في طريق في بحر ... لا يا ست البيت عاوزة أقولك يا بختك بارتياع
وشكرا على شوية الأفكار الجامدة اللي إنت قولتيها.. اهل اسكندرية بقى أو اللي مسافر اسكندرية ممكن يبقى يطبقها
نورتي البيت يا ست البيت وكرري الزيارة
تحياتي
:)
عروس البحر
_________
التعليق اللي قابلك على طول كان من اسكندرية وإنت اسمك ليه علاقة بالبحر ... تعليقات الصيف دي جامدة جدا
انا كمان سعيدة بوجودك وربنا يخلي ليكي صاحبتك الانتيم.. كرري الزيارة
تحياتي
رئيس جمهوريه نفسى
__________________
ازيك يا سيادة الرئيس .. يارب تكون بخير
التوست بالفول على بعضيها كلمة مجازية تعني التغيير .. وممكن تستخدمها بمعناها المباشر "عيش التوست وأكلة الفول الشعبية" والاتنين حيعملوا معاك فرق جامد
تحياتي
S H A H ...
______________
ههههههههههههه
طيب ايه؟؟؟.. حاولك تشوفك قريب وتخرج معاك .. ومش تنسى تشتري ليك هدية
كرر الزيارة .. تحياتي
إرسال تعليق