followers

إجمالي مرات مشاهدة الصفحة

الثلاثاء، 22 يوليو 2008

أميرة بمنديل وفارس بشنب.. إشتغالات






كان الزوج جالسا على الأريكة... مردتيا سروال مخطط وفانلة بيضاء من الحملات... وكرشة الضخم ممد أمامه... وكان يشاهد التلفزيون في ملل ورتابة ثم نادى على زوجته بصوت عالي أجش قائلا : يا أميرة... فين الشاي ؟؟

أجابته الزوجة من المطبخ وسط تكسير عدد من الحلل والكوبيات بإمتعاض:حاضر يا فارس.. ثوانييييييي ثم قالت في نفسها: يادي الهم.. ربنا ياخد الشاي

خرجت الزوجة من المطبخ وهي حاملة كوب الشاي في يدها... في خطوات ثابتة يصدر منها صوت منتظم، هو صوت "الشبشب المنزلي ".. وهي ترتدي جلباب معقود من منطقة الوسط أكثر من عقده... تحته هيكول برقبه وبنطلون طويل... وترتدي على رأسها منديل مربوط للخلف ثم قدمت لزوجها الشاي وعلى وجهها تكشيرة محترمة.. وجلست على الكرسي الذي بجواره وتناولت طبق من اللب الابيض الموضوع على المنضدة المقابلة وظلت تشاهد مع زوجها التلفزيون دون أن تبادله كلمه واحده

وظل الزوج والزوجة يشاهدان التلفاز في صمت تام .. لا يقطعة غير صوت الزوج وهو يشرف الشاي بصوت عالي " سوووووف" والزوجة تنافسة في قزقرة اللب "تك تك تك.. بوف

ثم إلتفتت الزوجة إلى زوجها ونظرت إليه طويلا وركزت بعينيها على كرشة الضخم وقالت في حوار داخلي طويل مع نفسها: بقى هو ده اللي حلمت بيه... هو ده فارس أحلامي... بعد ما حلمت بواد جان طويل ووسيم في هيبة رشدي أباظة وجمال وطله حسين فهمي... يكون آخري إن أخد راجل كل هوايته في الدنيا اللعب في صوابع رجليه والفرجة على شنبه في المراية...ولا المجانس...المجانس اللي قلت حتباهى بيها قدام الخلق... تطلع في بطنه بدل كتافة على شكل كرش كبير مالوش آخر... ده إيه الهم اللي أنا فيه ده... وأحلامي الوردية اللي حلمت بيها... حلمت إني أنام كل يوم على أنغام الموسيقي بعد ليلة رومانسية جميلة أقضيها معاه... تكون نهايتي على سمفونية شخير سي فارس موزارت... وياريت على كده وبس ده مافيش كلمة عدلة بيعرف يقولها... هو ده فارس أحلامي الرومانسي الحالم.. كتبوا في كتب الرومانسية إني الراجل لما يحب يغازل مراته يقولها : يا حبيبتي .. قومي إعملي شاي ... وبعد كده يختصر الكلام الرومانسي ... "لقومي اعملي شاي وبس".. انا لو كنت اعرف إن الكرش والشاي والشنب الغريب ده هو نهايتي ماكنتش حلمت ولا اتنيلت

نظر الزوج إلى زوجتة ووجدها منصبة بعين متفحصة على كرشة الضخم فنظر إلى كرشه في قلق ثم نظر إليها قائلا : إييييييييه... فييييييه إييييييييه... مالك متنحة فيه كده؟؟؟؟

انتفضت الزوجة قائلة : لا أبدا ... سرحت شوية.. عادي يعني ثم عادت إلى قزقزة اللب ومشاهدة التلفزيون

وهنا أتى دور الزوج لينظر إلى زوجته ويدقق النظر في المنديل الذي على رأسها وتحته شعر مهوش في كل مكان ثم تقع عينه على خرم في كتف الجلابيه التي ترتديها ويدقق النظر أكثر ليجد عدد لا باس به من الاخرام فيقول في نفسه : ولا بنت البواب ... ده بنت البواب بتلبس أحسن منها... يعني هي الهدوم خلصت من البيت... مالقتش غير الجلابية اللي بميت قاطعة دي... وانا اللي كنت فاكر إني حتجوز منى ذكي ... اه لو أشوف اللي قالي إن كل البنات واحد وبشوية حركات تقدر تكون في ميت شكل وشكل ... بقى ياربي هي دي أميرة أحلامي... أميرة أحلامي بمنديل على رأسها وشعر منكوش.. قبل الجواز كنت بحلم بمراتي متجددة ومتغيرة دايما وفعلا لاقيتها "نعم" المتجددة يوم تقوم بدور "شيتا" وتستخسر المشط يمشي على شعرها ويوم ألاقيها الخالق الناطق بنت البواب ... ساعات بنسى وأحس إني خلاص حديها حسنة... اه لو اعرف بتجيب الهدوم دي منين.. وياما حلمت قبل الجواز ببرفان مراتي الباريسي اللي حيخليها إمرأة متجددة كل يوم... لاقتيها مش بتسخدم غير العطر المصري الشهير البصل والتوم... وكنت متخيل إني حقضي أيام رومانسية جميلة كلها موسيقي هاديه... والحقيقة إنها مش حرماني من الرومانسية دي ... عندها شوية شباشب بتعزف أحلى الألحان... وكل شبب ليه لحن مختلف عن التاني... أموت وأعرف بتجبهم منين..لو كنت اعرف إني أميرة الأحلام بمنديل قوية وشبب بيعزف ألحان ماكنتش حلمت ولا اتنيلت


لينتهي المشهد والزوج جالس يلعب في أصابع قدمية بجوارة الزوجة وهي تقزقز اللب وكل منهم ينظر بحسرة إلى ذلك المشهد من فيلم " أغلى من حياتي " حين جرت شادية على الشاطيء قائلة أحمدددددددد وصلاح ذو الفقار يجرى عليها في لهفة قائلا منىىىىىىىىىىى

هناك 13 تعليقًا:

Beautiful Mind يقول...

سلام عليكم
هوا دا من اثر الصداع ولا ايه ياراما
:)
بس بجد كوميديا ساخرة من الطراز الأول بس ليه نسيتى تحطى صورة ولد عامل طياره جوه البيت وماشى فوووو..فووو وعمال يكسر ويخبط ..وبنت متقمصه دور مغنية وشغاله تزعق...هههه
نصيحه بلاش تفكير فى الموضوع ده كتير لحسن سمعتهم بيقولوا اللى يخاف من العفريت يطلعله

الحلم العربي يقول...

هههههههههه
انا ما قدرتش امسك نفسي من الضحك يا بنتى ايه الجمال ده ؟؟
بس بجد يا راما الموضوع مش بالشكل خالص و يمكن فارس أحلامها اللى بكرش ده يكون في تعامله معاها بنى آدم بجد و هي كمان ممكن تكون بالجلبية بتاعتها أحن عليه من واحدة شبه نانسي عجرم ، طبعا مش بقول الناس تهمل في نفسها بعد الجواز لكن أعتقد إن الجواز حاجات تانية أهم بتخلى الواحد يحاول يعمل كتير علشان يرضي اللى قدامه و يتغاضي عن حاجات تانية علشان حاجات أهم

بعيدا عن الاشتغالة التحفة ، وحشتييييييييييييني

.:.-=- ELGaZaLy-=-.:. يقول...

ههههههههههههههههههههههههه

عارفة ان حوارك دة بسمع حوار قريب منة تقريبا كل يومين 3 ...بس بجد ضحكتينى يا راما

blue-wave يقول...

هههههههههه
حلوة يا راما
بس هاقولك حاجه
للأسف الحياة بتجبرنا نتشغل
ولكن
بأيدينا نغير الواقع
ونخليه احلى من الحلم
صدقينى
بس الأتنين يتفقوا على كدا
ومهما الدنيا تاخدهم
يفضلوا متبتين على احلامهم
تحياتى

غير معرف يقول...

السلام عليكم ورحمة الله وبركاته

عارفه يا أستاذه (راما) لو كل واحد عرف واجباته قبل حقوقه كانت الحياة بقت حلوة..

يعني مثلا من واجبات الزوج على زوجته إنه يقدرها ويحسن معاملتها ويشوف إيه اللي هي بتحبه ويعمله وإيه اللي ما بتحبوش وما يعملوش ويهيء نفسه ليها (يلبس لها لبس شيك وحلو في البيت ويضع أفضل البارفانات .. إلخ) يعني مش لازم تكون الزوجة هي اللي بس بتتزين لزوجها وهي بس اللي بتقول الكلام الحلو لازم هو كمان يكلمها كلام جميل ويحسسها بجمالها ويشعرها بأنوثتها ويشكرها دائما ودائما ينده لها بأحب الأسماء ليها ويدلعها .. الكلام كتير بس أهم حاجه إنه فعلا يقدر اللي بتعمله يعني مثلا هي ممكن تفضل واقفه في المطبخ طول اليوم وعماله تطبخ لسيادته وفي الآخر يقعدوا الاتنين على السفرة وسيادته ما يهونش عليه يقول لها كلمة شكر ولما تسأله إيه رأيك في الأكل علشان تسمع منه كلمة حلوة ولا حاجه زي تسلم إيديكي يا حياتي والله الأكل النهارده من أحلى الأكلات اللي أكلتها في حياتي وكلام من ده تلاقيه هو بيرد عليها ويقول (الرز بس كان ناقص سوى واللحمة مش مستوية كويس والخضار كان ناقص شوية ملح ...) يخليها تقوم من على الأكل وتقول أنا غلطانه أنا كنت عملت أي حاجه وخلاص في السريع أنا إيه اللي خلاني أجيب وجع الدماغ لنفسي.

فالمفروض دائما وأبدا أن يشكرها على مجهودها لأنها بذلت مجهودها ده علشان تسعده ومش عايزه حاجه غير كلمة حلوة وبس.


أما بقى حقوقه (واجبات الزوجة)

إنها برضو تقدر زوجها وتقدر ظروفه دائما وتحبه وتشعره دائما بحبها ليه وما تكونش نكدية وتسمع كلامه وتكون صادقه دائما معاه وتكلمه بأسلوب محترم ويكون هو سكنها ويكون هو أغلى ما عندها وتتهيأ له وتتزين له مش تبقى في البيت لابسه طول اليوم لبس المطبخ ولما تكون خارجه تلبس أحلى الثياب وكأنها لا تتزين إلا عند الخروج
المفروض دائما يشوفها في أجمل وأحلى صورة وتجعل عينه لا تنظر إلى غيرها فهي من واجبها أن تجعل نفسها أجمل من في الكون ويجب أن يكون هو الآخر قنوع بها ويحبها .

Unknown يقول...

دي صزرة حقيقية لكل راجل وست بيتجوزوا جواز روتيني مش عن حب..الي بيحب واحدة أو الي بتحب واحد بيحالوا يظهروا قدام بعض بأحس حال..حتى لما يتجوزوا..دي حالة أكتر الناس في مصر..مش شرط صوابع رجليه ممكن يلعب بصوابع إيديه على خدود مراته..
ربنا يعافينا يارب
كل ودي

sakayar يقول...

هههههههههه
ههههههههههه
ههههههههههههههههه
أميرة وفارس؟؟
بصراحة ليكي في الكتابة الساخرة جدا
جربتي تلعبي ف الموضوع ده قبل كده بخلاف المدونة؟؟
بس هو ليه فعلا كده؟؟
يعني بعد الجواز تلاقي الكل بيطلع "القطط الفطسانة" ف التاني لينهي حلمه على كابوس مزمن
على الرغم انهم لو حاولوا يركزوا هيعرفوا بكام حركة على رأي فارس ما قال يبقى الزوج والزوجة اسعد كوبل في المنطقة
ع العموم
ربنا يحفظنا ويحمينا من الاحلام المزعجة دي
واشتغالة لذيذة بجد
تحياتي

Oma يقول...

hhhhhhhhhhhhh

homa elly 3amlo kda fe nafshom..momken el basha ye5es aw mmkn heya t2om te3'ayr el galbya om met 5orma de ! :D
alaz 7aga en msh laye2 3la abo kersh da yekon esmo Fares wla el o5t om mandel w sha3r mankosh elly ta2riban fe a5er el film hattl3 bent el bawab Amira...Amira men bas

dante elly Amira walahy
wa7shteny :) ... mat3'ebesh

ست البيت يقول...

راما،،، زميلة الكفاح الكارتوني
يااااااااااااه
بقالي كتير ما جيتش
بقالي كتير بعيدة ولا حد سال عليا
جميلة قوي قوي قويييييييييييييييييييييييييي
ومالهاش حل
بجددا اللي بيحصل
وعجبني كلام عيش
وعلى رأي المثل يا هاوس كيبر اطبخي
يا الدلعدي كلف

الخيط الرفيع يقول...

سلام عليكم

ههههههههههههههههه
هههههههههه
عارفة المشكله فين كل واحد واقف في شباكة هو بيبص بعينه هو وبكل سلبية ما حدش عندة رغبة في المبادرة وانقاظ الحياة
لان لو الرغبة وجدت والرضا بما رزقك الله هيكون في حاجات بسيطة قوي ترجع حاجات كبيرة قوي

MarwaAshraf يقول...

سلام عليكم جميعا

أنا اسفةاني مش حقدر أرد عليكم .. بس أنا قريت كل كلمة وفرحانة بوجودكم وكلامكم.. انا اسفة مرة تانية بس والله غصب عني .. الشغل مخليني مش عارفة اعمل اي حاجة غير اني أكون أله

:) سلامات كلكم وشكرا أوي

Salma Amer يقول...

اية الرومانسية اللي بتنقط من البوست دة
ولا الحته بتاعة صوابع الرجلين دي حرام عليكي
يا راما

غير معرف يقول...

حلوة يا مروة كتابتك دي..انتي عارفة انا شايفاك قدامي كاتبة سيناريو لأفلام كوميدية جميلة..نصيحتي..اقرأي شغل بلال فضل الساخر سواء في الدستور أو الكتب اللي بيصدرها..وممكن كمان تبدأي تقري سيناريوهات لأفلام اتعملت أو لسة هاتتعمل..وممكن أرشدك على الطريق اللي ممكن تجيبي منه السيناريوهات دي...وربنا يوفقك