الجمعه

R@M@

يوم الجمعه هو عيد لكل المسلمين .. بفتكر لما تيجي ليله الخميس .. كنت أتنطط قدام بابا الله يرحمه واقوله بكره العيد ودلوقتي قدام ماما بكره العيد وحنعيد .. وهو فعلا عيد على المسلمين .. في رحمه كبيرة أوي من ربنا .. السماء بتكون مفتوحه يعني الدعاء مستجاب .. وكمان بنصلي على النبي صلى الله عليه وسلم .. يعني ربنا والملائكة بيصلوا علينا عشر صلوات... لكن الأهم من ده كله هو لمه العيله .. بفتكر ايام لما كان بابا معايا كان ينزل السوق ويشتري أحلى فطار وبابا كان ماهر جدا في الطبخ يحضر الفول بالطحينه ويعمل الطعميه في البيت ويحمر البطاطس ويعمل أحلى سلطه ويبدأ محمد الله يرحمه يجي ومعاه مراته وولاده يزيد وروفان .. ومنى أختي كانت تيجي ومعاها زوجها ابيه عاطف وولادها عمرو (جوني) وأحمد (منصور) وأختي الصغيره مي اللي هي دلوقتي متجوزة ومستنيه بنتها سنفوره .. وبعدين تبدأ منافسه الطبخ بين بابا ومنى ومي ... بس طبعا المعلم الكبير يكسب كان نفسه حلو أوي في الأكل .. دلوقتي الدنيا اتغيرت بابا ومحمد رحلوا الله يرحمهم ودلوقتي زيارات من أولاد أخي رحمه الله ومن مي وزوجها .. أو زيارات من عمامي وعماتي .. أو زيارات من خلاني وخالتي اللي في البلد .. وبيكون فيه أحلى أكل على الفطار والغدا والعشا .. وانواع مختلفه من الفاكهه لأن بابا الله يرحمه كان عارف اني سفاحه فاكهه .. بحب الفراولة وبحب الموز زي النسناس .. بحب جوز الهند والدوم لو حنعتبر دول فاكهه يعني .. انا بحب يوم الجمعه لأنه بركه وصله للأرحام وأحلى لمه للعيله الجميلة .. ربنا يجمعكم كلكم على الخير ويرحم من تركونا ويجمعنا بهم في الفردوس الأعلى مع النبيين والصديقين والشهداء .. جمعه مباركه