followers

إجمالي مرات مشاهدة الصفحة

الثلاثاء، 22 ديسمبر، 2009

دايما أول فرحتنا





منى
مروة
ياسمين
يارا
مي

منى ومي ومروة أخوات
وياسمين ويارا أخوات
والخمسة عايشين في بيت واحد

منى كانت أكبرنا وهي اللي بدأت كل حاجة
أول بنت شرفت في العائلة كانت هي
أول واحدة دخلت المدرسة كانت هي
ومن وراها الأربع بنات بيسمعوا منها ويعرفوا وبعدين جربوا بنفسهم المدرسة

منى أول واحدة تدخل الثانوية العامة
واحنا من بعيد بنراقبها وبنتعلم منها

منى أول واحدة دخلت الجامعه
هي كانت الشباك اللي كنا بنطل منه على عالم الجامعة
قاعدة على السرير بليل في عز الشتاء .. تحكي واحنا بنسمع ونضحك ونسأل ونعرف
ونحقد عليها علشان بتلعب على الكمبيوتر في أول يوم جامعه مش محتاسة زينا

منى أول واحدة دق العريس باباها
نراقبه كلنا وهو جاي من أول الشارع
راقبنا نظافة جزمته
شوفناها وهي راجعه بورده في إيدها
نزلنا أشترينا معاها الفستان
وحضرنا فرحها ودخلنا بيتها
والنهاردة شوفنا أول حفيد لينا في العيله
سفرجل أو عمر
عمر هو الأسم اللي "ماما منى" اختارته علشانه
سفرجل هو الأسم اللي اختارته العائلة علشان مامته كانت على طول بتاكل سفرجل
وهو فعلا سفرجل
كتكوت ومقطقط في حجم السفرجل
لونه جميل زي السفرجل
وطعمه مسكر زي السفرجل
احساس جميل أوي لما بقيت خالتو راما
احساس حلو أوي لما تشوف أول مرة بيضحك فيها
أول مرة بيفتح فيها عينه
أول مرة بيقول فيها واء
ادعوا لسفرجل قصدي لعمر بالصحة والبركة والصلاح وطول العمر
:)